ഭക്തരെ വേദനിപ്പിച്ചെങ്കിൽ ക്ഷമ , കണ്ണീരണിഞ്ഞ് അന്ന രാജൻ

ആറ്റുകാൽ പൊങ്കാലയുമായി ബന്ധപ്പെട്ട് തന്റെ പേരിൽ സമൂഹമാദ്ധ്യമങ്ങളിൽ നടക്കുന്ന വിവാദങ്ങളിൽ വൈകാരികമായി പ്രതികരിച്ച് നടി അന്ന രാജൻ.ശുദ്ധമായ ഭക്തിയോടെയാണ് ആറ്റുകാൽ എത്തി പൊങ്കാല അർപ്പിച്ചതെന്നും തന്റെ വസ്ത്രങ്ങളോ ഭാവങ്ങളോ ഏതെങ്കിലും ഭക്തരെ വേദനിപ്പിച്ചിട്ടുണ്ടെങ്കിൽ ക്ഷമ ചോദിക്കുന്നുവെന്നും അന്ന പറഞ്ഞു.കൈകൂപ്പിയും കണ്ണു നിറഞ്ഞുമാണ് താനിത് എഴുതുന്നതെന്ന ആമുഖത്തോടെയാണ് പ്രതികരണം.

..... "കൈകൂപ്പിയും കണ്ണീരോടെയും ആറ്റുകാൽ അമ്മയുടെ പരിശുദ്ധ പാദങ്ങളിൽ പൊങ്കാല സമർപ്പിച്ചത് എന്റെ ജീവിതത്തിലെ ആദ്യ അനുഭവമായിരുന്നു. ശുദ്ധമായ ഭക്തിയോടെയാണ് ഞാൻ എത്തിയതും. അത്യന്തം ചൂടിൽ നിൽക്കുകയും, കൊതുമ്പു ചൂട്ടുമൊക്കെ കൊണ്ട് പാചകം ചെയ്യുകയും, ഹൃദയത്തിൽ വിശ്വാസത്തോടെ അമ്മയുടെ നാമം ജപിക്കുകയും ചെയ്തിരുന്നു. ആ വിശുദ്ധ നിമിഷത്തിനിടെ ചില അനാവശ്യ വീഡിയോകളും ക്ലിപ്പുകളും പകർത്തി പങ്കുവെക്കപ്പെട്ടു. മാധ്യമങ്ങൾ ഉൾപ്പെടെ എന്റെ ചുറ്റുമുണ്ടായിരുന്ന എല്ലാവരെയും ഞാൻ വിശ്വസിക്കുകയും ആദരിക്കുകയും ചെയ്തിരുന്നു. ആ ദിവസത്തെ ഭക്തിയെ മറച്ചു നിൽക്കുന്ന തരത്തിൽ ചില നിമിഷങ്ങൾ മാത്രം എടുത്ത് പ്രചരിപ്പിച്ചത് എന്നെ വേദനിപ്പിച്ചു. എന്റെ സാരി, എന്റെ ഭാവപ്രകടനങ്ങൾ, അല്ലെങ്കിൽ എന്റെ ഭാഗത്തുനിന്നുമുള്ള എന്തെങ്കിലും ശ്രദ്ധക്കുറവ് ഏതെങ്കിലും ഭക്തരുടെ വികാരങ്ങളെ വേദനിപ്പിച്ചിട്ടുണ്ടെങ്കിൽ, ഞാൻ ഹൃദയം നിറഞ്ഞ് ക്ഷമ ചോദിക്കുന്നു. അത് ഒരിക്കലും എന്റെ ഉദ്ദേശമല്ലായിരുന്നു. അമ്മയ്ക്ക് എന്റെ ഹൃദയം അറിയാം. ഞാൻ അനുഭവിച്ച പ്രയാസങ്ങളും ചൂടും പ്രാർത്ഥനകളും, എന്റെ പുഞ്ചിരിയുടെ പിന്നിലെ സത്യസന്ധതയും അമ്മയ്ക്കറിയാം. ആ സത്യമാണ് എന്റെ വിശ്വാസം. ആറ്റുകാൽ അമ്മയുടെ വിനീത ഭക്തയായിത്തന്നെ ഞാൻ എപ്പോഴും തുടരും. അമ്മയുടെ പാദപദ്മങ്ങളിൽ എല്ലാം സമർപ്പിച്ചു." അന്നയുടെ വാക്കുകൾ