ടെക്നോപാർക്കിന് വീണ്ടും അംഗീകാരം

തിരുവനന്തപുരം: പ്രമുഖ റേറ്റിംഗ് ഏജൻസിയായ ക്രിസിലിന്റെ (ക്രെഡിറ്റ് റേറ്റിംഗ് ഇൻഫർമേഷൻ സർവീസ് ഒഫ് ഇന്ത്യ ലിമിറ്റഡ്) എ പ്ലസ്/സ്റ്റേബിൾ റേറ്റിംഗ് അഞ്ചാം തവണയും സ്വന്തമാക്കി ടെക്‌നോപാർക്ക്.സാമ്പത്തിക വളർച്ചയും പുരോഗതിയും മികവും നിലനിറുത്തുന്നതിനാണ് അംഗീകാരം.

തുടർച്ചയായി രണ്ട് വർഷം ക്രിസിൽ എ സ്റ്റേബിൾ റേറ്റിംഗ് നിലനിറുത്തിയതിന് ശേഷമാണ്,​ടെക്‌നോപാർക്കിന് 2021ൽ ആദ്യമായി എ പ്ലസ്/സ്റ്റേബിൾ റേറ്റിംഗ് ലഭിക്കുന്നത്.പിന്നീട് 2024 വരെ തുടർച്ചയായി എ പ്ലസ് സ്റ്റേബിൾ റേറ്റിംഗ് ലഭിച്ചു.

ഇതര സ്ഥാപനങ്ങളുമായി കടബാദ്ധ്യതയില്ലാത്തതും,​ലാഭകരവുമായ ടെക്‌നോപാർക്കിന്റെ സാമ്പത്തിക ജാഗ്രതയോടെയുള്ള പ്രവർത്തനം ക്രിസിൽ പരിഗണിച്ചു. മുഴുവൻ ഓഫീസ് സ്ഥലവും പ്രയോജനപ്പെടുത്തിക്കൊണ്ടുള്ള ടെക്‌നോപാർക്കിന്റെ വിവിധ ക്യാമ്പസുകളുടെ പ്രവർത്തനം, ക്ലയന്റുകളിലെ വൈവിദ്ധ്യത്തിലൂടെ ഉറപ്പാക്കുന്ന സാമ്പത്തികസ്ഥിരത, ദീർഘകാല സുസ്ഥിരത നിലനിർത്തിക്കൊണ്ട് സാമ്പത്തിക ബാദ്ധ്യതകൾ നിറവേറ്റാനുള്ള കഴിവ് തുടങ്ങിയവയും റേറ്റിംഗിൽ മാനദണ്ഡങ്ങളായി.

ക്രിസിലിന്റെ എ പ്ലസ്/സ്റ്റേബിൾ റേറ്റിംഗ് നേടാനായത് ടെക്‌നോപാർക്കിന്റെ സുസ്ഥിരമായ സാമ്പത്തിക മാതൃകയും വളർച്ചയും അടിവരയിടുന്നതാണെന്ന് ടെക്‌നോപാർക്ക് സി.എഫ്.ഒ വിപിൻ കുമാർ പറഞ്ഞു.