വിഷു ആഘോഷത്തിന് ചാക്കോച്ചനും ടൊവിനോയും

തിരുനെല്ലിയുടെ പശ്ചാത്തലത്തിൽ ഒരു ദുരൂഹ സാഹചര്യത്തിൽ

പീരിഡ് ഡ്രാമയായി പള്ളിചചട്ടമ്പി

ഇക്കുറി തിയേറ്ററുകളിലെ വിഷു ആഘോഷത്തിന് കുഞ്ചാക്കോ ബോബനും ടൊവിനോ തോമസും. കുഞ്ചാക്കോ ബോബൻ നായകനായ ഒരു ദുരൂഹ സാഹചര്യത്തിൽ ,ടൊവിനോ തോമസ് നായകനായ പള്ളിചട്ടമ്പി എന്നിവയാണ് വിഷു റിലീസ്. ഇരു ചിത്രങ്ങളും വിഷുദിനമായ ഏപ്രിൽ 15ന് റിലീസ് ചെയ്യും . പുതുവർഷത്തിൽ ഇരുതാരങ്ങളുടേയും ആദ്യ റിലീസാണ്.

ന്നാ താൻ കേസ് കൊട് എന്ന ബ്ളോക് ബസ്റ്റർ ചിത്രത്തിനുശേഷം കുഞ്ചാക്കോ ബോബനും സംവിധായകൻ രതീഷ് ബാലകൃഷ്ണൻ പൊതുവാളും വീണ്ടും ഒരുമിക്കുകയാണ്. ശരണ്യ രാമചന്ദ്രൻ ആണ് കുഞ്ചാക്കോ ബോബന്റെ നായിക. ക്വീൻ, ജനഗണമന എന്നീ സൂപ്പർഹിറ്റുകളുടെ സംവിധായകനായ ഡിജോ ജോസ് ആന്റണി ആണ് പള്ളിചട്ടമ്പി ഒരുക്കുന്നത്. കയാദു ലോഹർ ആണ് നായിക. വയനാട്ടിലെ തിരുനെല്ലിയുടെ പശ്ചാത്തലത്തിൽ ആണ് ഒരു ദുരൂഹ സാഹചര്യത്തിൽ ഒരുങ്ങുന്നത്.

ചിത്രത്തിന്റെ കഥാ പശ്ചാത്തലം അതീവ രഹസ്യമായി സൂക്ഷിച്ചിരിക്കുകയാണ്. ദിലീഷ് പോത്തൻ, സജിൻ ഗോപു, ചിദംബരം, ജാഫർ ഇടുക്കി, ഷാഹി കബീർ തുടങ്ങിയവരാണ് മറ്റു താരങ്ങൾ.

1950കൾ മുതൽ 1960 കൾ വരെയുള്ള കാലത്ത് ഹൈറേഞ്ചിന്റെ പശ്ചാത്തലത്തിൽ ആണ് പള്ളിചട്ടമ്പി. പൃഥ്വിരാജ് അതിഥിവേഷത്തിൽ എത്തുന്നുണ്ട്. വിജയരാഘവൻ, ബാബുരാജ്, സുധീർ കരമന, പ്രശാന്ത് അലക്സ് തുടങ്ങിയവരും നിരവധി പുതുമുഖങ്ങളും അണിനിരക്കുന്നു. എസ്. സുരേഷ്‌ബാബു രചന നിർവഹിക്കുന്നു. അതേസമയം രതീഷ് ബാലകൃഷ്ണൻ പൊതുവാൾ ആണ് ഒരു ദുരൂഹ സാഹചര്യത്തിലിന് രചന നിർവഹിക്കുന്നത് . ഛായാഗ്രഹണം അർജുൻ, സേതു, ഉദയ പിക്‌ചേഴ്സിന്റെ ബാനറിൽ കുഞ്ചാക്കോ ബോബനും മാജിക് ഫ്രെയിംസിന്റെ ബാനറിൽ ലിസ്റ്റിൻ സ്റ്റീഫനും ചേർന്നാണ് നിർമ്മാണം. ടിജോ ടോമി ആണ് പള്ളിചട്ടമ്പിയുടെ ക്യാമറ. വേൾഡ് വൈഡ് ഫിലിംസിന്റെ ബാനറിൽ നൗഫൽ, ബ്രിജീഷ്, സി ക്യൂബ് ബ്രോസ് എന്റർടെയ്ൻമെന്റിന്റെ ബാനറിൽ ചരൻ, ചാണക്യ, ചൈതന്യ എന്നിവരും ചേർന്നാണ് നിർമ്മാണം.