മക്കൻ ചെല്ലപ്പന്റെ മരണം: സി.പി.ഐ പരാതി നൽകി

വൈക്കം: തലയാഴം പുളിക്കാത്തറയിൽ മക്കൻ ചെല്ലപ്പൻ സി.പി.ഐ ഓഫീസിനു മുന്നിലെ എൽ.ഡി.എഫ് ഇലക്ഷൻ കമ്മി​റ്റി ഓഫീസിൽ ദുരൂഹസാഹചര്യത്തിൽ മരിച്ച സംഭവം പ്രത്യേക പൊലീസ് ടീം അന്വേഷിക്കണമെന്നാവശ്യപ്പെട്ട് സി.പി.ഐ പരാതി നൽകി. ചെല്ലപ്പൻ മരിക്കുന്നതിന് മുമ്പ് പ്രസിദ്ധീകരിച്ച സാമൂഹ്യമാധ്യമ പോസ്​റ്റുകളും റെക്കോഡ് ചെയ്തു എഡി​റ്റ് ചെയ്യപ്പെട്ട വീഡിയോ സംബന്ധിച്ചും ഉപയോഗിച്ചിരുന്ന ഫോൺ കാണാതായതും ഇദ്ദേഹം ഓഫീസിൽ വന്ന വാഹനത്തിന്റെ താക്കോൽ കാണാതായതുമെല്ലാം ദുരൂഹത ഉളവാക്കുന്നതാണ്.

ചെല്ലപ്പനുമായി യാതൊരുവിധ തർക്കങ്ങളോ വൈരാഗ്യങ്ങളോ ഇല്ലാതിരുന്ന സി.പി.ഐയുമായി ഈ മരണത്തെ ബന്ധപ്പെടുത്താനുള്ള ദുരുദ്ദേശപൂർണമായ ശ്രമങ്ങളും നടന്നിരുന്നു. ഈ സാഹചര്യങ്ങൾ മുൻനിറുത്തിയാണ് ഇക്കാര്യങ്ങളെല്ലാം വിശദമായി അന്വേഷിക്കണമെന്ന് ആവശ്യപ്പെട്ട് സി.പി.ഐ വൈക്കം മണ്ഡലം കമ്മി​റ്റി സെക്റട്ടറി ജില്ലാ പൊലീസ് മേധാവിക്കും ഡി.ജി.പിയ്ക്കും രേഖാമൂലം പരാതി നൽകിയിരിക്കുന്നത്.