ഇനി കുറഞ്ഞ ചെലവിൽ ആഡംബര യാത്ര; ഇന്ത്യയിലോടുന്ന അറിഞ്ഞിരിക്കേണ്ട അഞ്ച് ഡബിൾ ഡെക്കർ ട്രെയിൻ സർവീസുകൾ

സാധാരണ ട്രെയിൻ യാത്രകളിൽ നിന്നൊക്കെ വ്യത്യസ്തമായി യാത്രികർക്ക് കൗതുകമുണർത്തുന്നതാണ് രണ്ടു നിലകളിലായി ഇരുന്ന് യാത്ര ചെയ്യാവുന്ന എസി ഡബിൾ ഡെക്കർ എക്‌സ്പ്രസുകൾ. പുറംകാഴ്ചകൾ ആസ്വദിക്കാനും കുറഞ്ഞ സമയത്തിനുള്ളിൽ ലക്ഷ്യസ്ഥാനത്ത് എത്താനും സാധിക്കുമെന്നതാണ് ‌ഡബിൾ ഡെക്കർ ട്രെയിനുകളുടെ പ്രത്യേകത. ഇന്ത്യയിലെ തിരക്കേറിയ നഗരങ്ങളെ ബന്ധിപ്പിക്കുന്നതിനായി അവതരിപ്പിക്കപ്പെട്ട ഈ ട്രെയിനുകളിൽ നിലവിൽ സർവീസ് നടത്തുന്ന പ്രധാന റൂട്ടുകൾ പരിചയപ്പെടാം.

മുംബയ് സെൻട്രൽ-അഹമ്മദാബാദ് എസി ഡബിൾ ഡെക്കർ (491 കി.മീ) ഇന്ത്യയിലെ ഏറ്റവും ജനപ്രിയമായ ഡബിൾ ഡെക്കർ സർവീസുകളിൽ ഒന്നാണിത്. ഇന്ത്യയുടെ പടിഞ്ഞാറൻ വാണിജ്യ കേന്ദ്രങ്ങളായ മുംബയ്‌യെയും അഹമ്മദാബാദിനെയും ബന്ധിപ്പിക്കുന്നു. ബിസിനസ് യാത്രക്കാർക്കും വിനോദസഞ്ചാരികൾക്കും ഒരുപോലെ പ്രിയപ്പെട്ട ഈ ട്രെയിൻ മഹാരാഷ്ട്രയുടെയും ഗുജറാത്തിന്റെയും മനോഹരമായ കാഴ്ചകളിലൂടെയാണ് കടന്നുപോകുന്നത്.

ചെന്നൈ-ബംഗളൂരു എസി ഡബിൾ ഡെക്കർ (359 കി.മീ)

തമിഴ്നാടിനെയും കർണാടകയെയും തമ്മിൽ ബന്ധിപ്പിക്കുന്ന ഈ സർവീസ് ദക്ഷിണേന്ത്യയിലെ പ്രധാനപ്പെട്ട റൂട്ടാണ്. ഐടി ജീവനക്കാർക്കും വിദ്യാർത്ഥികൾക്കും നിത്യയാത്രികർക്കും ഏറെ ഉപകാരപ്രദമായ ട്രെയിൻ ചെന്നൈ, ബംഗളൂരു എന്നീ മെട്രോ നഗരങ്ങൾക്കിടയിലെ ഏറ്റവും വേഗതയേറിയ ട്രെയിനുകളിലൊന്നാണ്.

ലക്‌നൗ ജംഗ്ഷൻ-ആനന്ദ് വിഹാർ ടെർമിനൽ (479 കി.മീ) ഉത്തർപ്രദേശിന്റെ തലസ്ഥാനമായ ലക്‌നൗവിനെയും ഡൽഹിയെയും ബന്ധിപ്പിക്കുന്ന സുപ്രധാന ട്രെയിനാണിത്. ഉത്തരേന്ത്യയിലെ തിരക്കേറിയ ഈ റൂട്ടിൽ കൂടുതൽ യാത്രക്കാരെ ഉൾക്കൊള്ളാൻ ഡബിൾ ഡെക്കർ കോച്ചുകൾ സഹായിക്കുന്നു. ജോലി ആവശ്യങ്ങൾക്കും ബന്ധുക്കളെ സന്ദ‌ർശിക്കാൻ പോകുന്നവർക്കും ഈ ട്രെയിൻ വലിയ ആശ്വാസമാണ്.

ജയ്പൂർ-ഡൽഹി സരായ് രോഹില്ല (304 കി.മീ) രാജസ്ഥാനിലെ പിങ്ക് സിറ്റിയായ ജയ്പൂരിനെ ദേശീയ തലസ്ഥാനവുമായി ബന്ധിപ്പിക്കുന്ന സർവീസ് വിനോദസഞ്ചാരികൾക്ക് ഏറെ പ്രിയപ്പെട്ടതാണ്. കുറഞ്ഞ ദൂരമുള്ള റൂട്ടായതിനാൽ തന്നെ ഒരേ ദിവസം പോയി വരാൻ ആഗ്രഹിക്കുന്നവർക്ക് ഈ ഡബിൾ ഡെക്കർ യാത്ര തിരഞ്ഞെടുക്കാം.

വിശാഖപട്ടണം-തിരുപ്പതി എസി ഡബിൾ ഡെക്കർ (761 കി.മീ)

ഇന്ത്യയിൽ നിലവിൽ സർവീസ് നടത്തുന്ന ഡബിൾ ഡെക്കർ ട്രെയിനുകളിൽ ഏറ്റവും ദൈർഘ്യമേറിയ റൂട്ടാണിത്. ആന്ധ്രാപ്രദേശിന്റെ വലിയൊരു ഭാഗവും പിന്നിടുന്ന ട്രെയിൻ തീർത്ഥാടകർക്കും ദീർഘദൂര യാത്രികർക്കും ഒരുപോലെ സൗകര്യപ്രദമാണ്.

പകൽ സമയത്തെ യാത്രകൾക്ക് ഏറ്റവും അനുയോജ്യമായ രീതിയിലാണ് ഈ ട്രെയിനുകളുടെ സമയം ക്രമീകരിച്ചിരിക്കുന്നത്. അത്യാധുനികമായ സീറ്റുകളും പൂർണമായും ശീതീകരിച്ച കോച്ചുകളും നിങ്ങളുടെ യാത്ര കൂടുതൽ സുഖകരമാക്കുമെന്ന കാര്യത്തിൽ സംശയമില്ല. അടുത്ത തവണ യാത്ര പ്ലാൻ ചെയ്യുമ്പോൾ ഒരു 'ഡബിൾ ഡെക്കർ' അനുഭവം കൂടി ഉൾപ്പെടുത്താൻ മറക്കരുതേ.