മദ്യനയക്കേസ് : സി.ബി.ഐ അപ്പീലിൽ വാദം പറയാനില്ലെന്ന് സിസോദിയയും

ന്യൂഡൽഹി: മദ്യനയക്കേസുമായി ബന്ധപ്പെട്ട് ഡൽഹി ഹൈക്കോടതിയിലുള്ള സി.ബി.ഐ അപ്പീലിൽ വാദം പറയാനില്ലെന്ന് ഡൽഹി മുൻ ഉപമുഖ്യമന്ത്രി മനീഷ് സിസോദിയയും. കേസിൽ ഡൽഹി മുൻ മുഖ്യമന്ത്രി അരവിന്ദ് കേജ്‌രിവാൾ അടക്കം മുഴുവൻ പ്രതികളെയും കുറ്റവിമുക്തരാക്കിയ വിചാരണക്കോടതി നടപടി ചോദ്യംചെയ്‌താണ് സി.ബി.ഐയുടെ അപ്പീൽ. ഇതിൽ വാദം കേൾക്കുന്നതിൽ നിന്ന് ജസ്റ്റിസ് സ്വരാന കാന്ത ശർമ്മ പിന്മാറണമെന്ന് ആവശ്യപ്പെട്ടിട്ടും തയ്യാറാകാത്ത സാഹചര്യത്തിൽ നിസഹകരിക്കാൻ കേജ്‌രിവാൾ തീരുമാനിച്ചിരുന്നു. ഗാന്ധിയൻ സത്യാഗ്രഹത്തിന്റെ ഭാഗമായുള്ള ആ നിലപാടിനൊപ്പം താനും നിൽക്കുകയാണെന്ന് സിസോദിയ വ്യക്തമാക്കി.