ലോക്ക്‌ഡൗണിന് ശേഷം തിയേറ്ററുകൾ നിറയണമെങ്കിൽ മദ്യം കൂടി നൽകണം, നിർദേശവുമായി ദുൽഖർ ചിത്രത്തിന്റെ സംവിധായകൻ
തിയേറ്ററുകളിലേക്ക് ആളെ എത്തിക്കാൻ മദ്യം വില്‍ക്കാനുള്ള ലൈസൻസ് നല്ലതായിരിക്കുമെന്ന നിർദേശവുമായി സംവിധായകൻ നാഗ് അശ്വിൻ. ലോക്ക്ഡൗൺ മൂലം പ്രതിസന്ധിയിലായിരിക്കുന്ന തിയേറ്റർ വ്യവസായത്തെ തിരിച്ചുകൊണ്ടുവരാനുള്ള നിർദേശമായാണ് ബിയർ, വൈൻ ലൈസൻസ് നല്‍കുന്നതിനെക്കുറിച്ച്‌ നാഗ് അഭിപ്രായപ്പെട്ടത്. മറ്റ് പല രാജ്യങ്ങളിലേയും പോലെ ഇവിടെയും മദ്യം തിയേറ്ററുകളിൽ നല്‍കുകയാണെങ്കിൽ കൂടുതൽ ആളുകൾ സിനിമ കാണാൻ എത്തില്ലേ എന്നാണ് സംവിധായകന്റെ ചോദ്യം.
അതേസമയം ഈ നിർദേശത്തിനെതിരെ രൂക്ഷ വിമർശനമാണ് സമൂഹമാദ്ധ്യമങ്ങളിൽ നാഗ് നേരിടുന്നത്. ഇന്ത്യയിൽ മദ്യം ഒരു ലഘുപാനീയം അല്ലെന്നും തിയേറ്ററുകളിൽ വിതരണം ചെയ്യുന്നത് വിഡ്ഢിത്തമാണെന്നുമാണ് ഇക്കൂട്ടരുടെ വാദം. കുടുംബപ്രേക്ഷകരെ ഇത് തിയേറ്ററുകളിൽ നിന്ന് അകറ്റുമെന്നും മറ്റൊരു കൂട്ടർ ചൂണ്ടിക്കാണിക്കുന്നുണ്ട്.
മദ്യം സുലഭമായത് കൊണ്ട് എല്ലാവരും മദ്യപാനികൾ ആകില്ലെന്ന വാദവുമായി ചിലർ സംവിധായകന് പിന്തുണ നല്‍കിയിട്ടുമുണ്ട്. ഉത്തരവാദിത്തത്തോടെയുള്ള മദ്യപാനം സമൂഹം പരിചയിക്കണമെന്നാണ് ഇക്കൂട്ടർ പറയുന്നത്.
കീർത്തി സുരേഷ്, ദുൽഖർ സൽമാൻ എന്നിവർ അഭിനയിച്ച മഹാനടി എന്ന ചിത്രത്തിലൂടെ ശ്രദ്ധയനായ സംവിധായകനാണ് നാഗ് അശ്വിൻ. പ്രഭാസിനെ നായകനാക്കി പുതിയ ചിത്രത്തിനുള്ള തയ്യാറെടുപ്പിലാണ് നാഗ് ഇപ്പോൾ.