ജയ് ശ്രീ റാം വിളിക്കാൻ നിർബന്ധിച്ച്​ ഓട്ടോറിക്ഷ ഡ്രൈവർക്ക്​ ക്രൂരമർദനം

ന്യൂഡൽഹി: "മോദി സിന്ദാബാദ്", "ജയ് ശ്രീ റാം" എന്നിവ വിളിക്കാൻ നിർബന്ധിച്ച്​ 52 ​​കാരനായ ഓട്ടോറിക്ഷ ഡ്രൈവർക്ക്​ ക്രൂരമർദനം. രാജസ്ഥാനിലെ സിക്കാറിലാണ്​ ഗഫാർ അഹ്മദ് കച്ചാവ എന്നയാളെ രണ്ടംഗസംഘം മർദിച്ചവശനാക്കിയത്​. പ്രതികളെ പൊലീസ് അറസ്റ്റ് ചെയ്തതായാണ് വിവരം. വെള്ളിയാഴ്ച പുലർച്ചെ നാലുമണിയോടെയാണ്​ സംഭവം.

"അക്രമികൾ എന്റെ താടി പിടിച്ചുവലിച്ചു. പൊതിരെ തല്ലി. മൂന്നോളം പല്ല്​ അടിച്ചുകൊഴിച്ചു. മരപ്പട്ടിക കൊണ്ടുള്ള ആക്രമണത്തിൽ ഇടതുകണ്ണിനും കവിളിനും തലക്കും സാരമായി പരിക്കേറ്റു. നിങ്ങളെ പാകിസ്ഥാനിലേക്ക് അയച്ചശേഷം മാത്രമേ ഞങ്ങൾ വിശ്രമിക്കുകയുള്ളൂവെന്ന് അവർ പറഞ്ഞു' -ഗഫാർ പൊലീസിൽ നൽകിയ പരാതിയിൽ പറഞ്ഞു. ഇദ്ദേഹത്തിന്റെ വാച്ചും പണവും മോഷ്ടിച്ചതായും പൊലീസ് പറഞ്ഞു. അടുത്ത ഗ്രാമത്തിൽ ട്രിപ്പ്​ പോയി മടങ്ങുമ്പോഴായിരുന്നു അക്രമികൾ ഗഫാറിന്റെ ഓട്ടോ തടഞ്ഞ് മർദിച്ചത്. അവരിൽനിന്ന്​ രക്ഷപ്പെട്ട്​ ഓട്ടോയുമായി പോകുന്നതിനിടെ കാറിൽ പിന്തുടർന്ന അക്രമികൾ ജഗ്​മൽപുരയ്ക്ക് സമീപം വീണ്ടും ഗഫാറിനെ പിടികൂടി,​ 'ജയ് ശ്രീ റാം', 'മോദി സിന്ദാബാദ്' എന്നിവ ചൊല്ലാൻ മർദിക്കുകയായിരുന്നു.