ഹോങ്കോംഗിന് പിന്നാലെ മലേഷ്യയിലും ഇന്ത്യക്കാർക്ക് യാത്രാവിലക്ക്

കോലാലംപൂർ: ഇന്ത്യയിൽ കൊവിഡ് വ്യാപനം രൂക്ഷമായതോടെ ഹോങ്കോംഗിന് പിന്നാലെ മലേഷ്യയും ഇന്ത്യയിൽ നിന്നുള്ള യാത്രക്കാർക്ക് അനിശ്ചിതകാലത്തേക്ക് വിലക്കേർപ്പെടുത്തി. കഴിഞ്ഞമാസമാണ് ഹോങ്കോംഗ് എയർ ഇന്ത്യ വിമാനങ്ങൾക്ക് രാജ്യത്തേക്ക് പ്രവേശിക്കുന്നത് വിലക്കിയത്.

ഇന്ത്യയ്ക്കൊപ്പം​ അമേരിക്ക,​ ഇംഗ്ളണ്ട്,​ ഫ്രാൻസ്, ഇന്റോനേഷ്യ, ഫിലിപ്പീൻസ് എന്നീരാജ്യങ്ങളിൽ നിന്നുള്ള യാത്രക്കാർക്കും മലേഷ്യയിൽ പ്രവേശനം നിരോധിച്ചു. വിദ്യാർത്ഥികൾ,​ സ്ഥിരതാമസക്കാർ എന്നിവർ ഉൾപ്പെടെ എല്ലാവർക്കും നിരോധനം ബാധകമാണ്. ദീർഘകാലത്തെ ഇമിഗ്രേഷൻ പാസുള്ളവർക്കും താത്കാലികമായി രാജ്യത്തേക്ക് പ്രവേശിക്കാനാവില്ലെന്ന് സർക്കാർ വ്യക്തമാക്കി. രാജ്യത്തെത്തുന്ന വിദേശികളിൽ നിന്നും അഭയാർത്ഥികളിൽ നിന്നും കുടിയേറ്റക്കാരിൽ നിന്നും കൊവിഡ് വ്യാപിക്കുന്നുവെന്ന റിപ്പോർട്ടിനെ തുടർന്നാണ് തീരുമാനം. മലേഷ്യയിൽ ഇതുവരെ 9,​374 കൊവിഡ് രോഗികളും 128 മരണവുമാണുള്ളത്.