ലോകത്ത് മൂന്നുകോടിയിലധികം രോഗികൾ, 250പേരിൽ ഒരാൾക്ക് കൊവിഡ്

വാഷിംഗ്ടൺ: ലോകത്ത്​ 250 പേരിൽ ഒരാൾക്ക്​ കൊവിഡ് ബാധയുണ്ടെന്ന്​ റിപ്പോർട്ട്​. വേൾഡ്​ വൈഡ്​ പാൻഡമിക്​ ഡാറ്റ അനുസരിച്ചുള്ള കണക്കുകളിലാണ്​ ഇക്കാര്യം വ്യക്​തമാക്കുന്നത്​.

ലോകത്തിൽ കൊറോണ വൈറസ് രോഗികളുടെ എണ്ണം മൂന്നുകോടി കടന്നു​​. ഐക്യരാഷ്​ട്രസഭയുടെ കണക്കുപ്രകാരം 2020 സെപ്തംബർ വരെ 780 കോടി ആണ് ലോകത്തെ മൊത്തം ജനസംഖ്യ. ഇതോടെ ലോകത്തിലെ 250പേരിൽ ഒരാൾക്ക്​ കൊവിഡ്​ ബാധിച്ചതായി കണക്കുകൾ ചൂണ്ടിക്കാട്ടുന്നു.

ജോൺസ് ഹോപ്കിൻസ് സർവകലാശാലയുടെ കണക്കുപ്രകാരം ലോകത്ത് ഏറ്റവുമധികം കൊവിഡ്​ കേസുകളും മരണങ്ങളും റിപ്പോർട്ട്​ ചെയ്യുന്നത്​ യു.എസിലാണ്​. അവിടെ 7,032,524 രോഗികളും 2,03,657 മരണങ്ങളും​ ഇതുവരെ സ്​ഥിരീകരിച്ചിട്ടുണ്ട്​​.

മരണം പത്തുലക്ഷം

കൊവിഡ് വ്യാപനം ആശങ്കാവഹമായി തുടരുന്നതിനിടെ ലോകത്ത് മരണം പത്ത് ലക്ഷം കവിഞ്ഞു. വേൾഡ് ഒ മീറ്ററിന്റെ കണക്ക് പ്രകാരം ഇന്നലെ വൈകിട്ട് വരെ 1,002,974 മരണം റിപ്പോർട്ട് ചെയ്തു. ലോകത്താകെ 33,342,491 രോഗികളാണുള്ളത്. 24,655,268 പേ‌ർ രോഗവിമുക്തരായി.അമേരിക്ക, ഇന്ത്യ, ബ്രസീൽ, റഷ്യ എന്നിവിടങ്ങളിൽ കൊവിഡ് വ്യാപനം അനിയന്ത്രിതമായി തുടരുകയാണ്.