കവിത പോസ്റ്റ് ചെയ്തു, ടെക് ബില്യണയർക്ക് നഷ്ടം 18,365 കോടി
ബീജിംഗ്: ആലിബാബ തലവനായ ജാക്ക് മാക്ക് പിന്നാലെ മറ്റൊരു ടെക് ബില്യണയർക്കെതിരെയും കടുത്ത നടപടി സ്വീകരിച്ച് ചൈന. മൈറ്റ്വൻ സ്ഥാപകൻ വാംഗ് സിംഗിനെയാണ് ചൈനീസ് സർക്കാർ ഭീഷണിപ്പെടുത്തിയിരിക്കുന്നത്. വലിപ്പത്തിൽ ചൈനയിൽ മൂന്നാം സ്ഥാനത്തുള്ള ടെക് കോർപ്പറേഷനാണ് മൈറ്റ്വിൻ. അതിന്റെ തലവനായ വാംഗ് സിംഗ് 1,100 വർഷം പഴക്കമുള്ള ഒരു ചൈനീസ് കവിത സോഷ്യൽ മീഡിയയിൽ പോസ്റ്റ് ചെയ്തതോടെയാണ് പ്രശ്നം ആരംഭിക്കുന്നത്. ഒാൺലൈൻ ഭക്ഷ്യ വിതരണ ശൃംഘല നടത്തുന്ന ശതകോടീശ്വരന്റെ പോസ്റ്റ് സർക്കാരിനെ വിമർശിക്കുന്ന തരത്തിലുള്ളതാണെന്ന് ചിലർ വ്യാഖ്യാനിച്ചതോടെ രണ്ട് ദിവസത്തിനുള്ളിൽ മൈറ്റ്വിന്റെ വിപണി മൂല്യത്തിൽ 26 ബില്യൺ ഡോളർ ഇടിവ് നേരിട്ടു. വാംഗ് സിംഗിനും തന്റെ സമ്പാദ്യത്തിൽ നിന്നും 2.5 ബില്യൺ ഡോളർ (18,365 കോടിയിലധികം) നഷ്ടമായി. കവിത പോസ്റ്റ് ചെയ്തതിന് ശേഷം ചൈനീസ് സർക്കാർ സിംഗിനെ വിളിപ്പിച്ചു. അദ്ദേഹത്തോട് കുറച്ചുകാലത്തേക്ക് ആർക്കും മുഖം കൊടുക്കാതെയും പൊതുയിടങ്ങളിൽ ഇറങ്ങാതെയും ജീവിക്കാനുമാണ് സർക്കാർ ഉത്തരവ്.