ലോകത്തിലെ ആദ്യ ഇലക്ട്രിക്ക് കപ്പൽ യാത്ര ആരംഭിച്ചു
ഒസ്‌ലോ : ലോകത്തിലെ ആദ്യത്തെ ഇലക്ട്രിക്ക് കപ്പലായ യാര ബിർക്ക്‌ലാൻഡ് നോ‌ർവേയിൽ വെള്ളിയാഴ്ച യാത്ര പുറപ്പെട്ടു. തെക്കുകിഴക്കൻ പട്ടണമായ പോർസ്ഗ്രണിലെ ഒരു പ്ലാന്റിൽ നിന്ന് 120 കണ്ടെയ്‌നർ വളവുമായി എട്ട് നോട്ടിക്കൽ മൈൽഅകലെയുള്ള ബ്രെവിക് തുറമുഖത്തേക്കാണ് കപ്പൽ ആദ്യയാത്ര നടത്തിയത്.
പ്രതിവർഷം 40,000 ഡീസൽ ട്രക്കുകളാണ് ഈ പ്ലാന്റിൽ നിന്ന് യാത്ര തിരിക്കുന്നത്. പ്രതിവർഷം വേണ്ടി വരുന്ന 40,000 ഡീസൽ ട്രക്കുകളുടെ യാത്രയ്ക്ക് പകരമാവുമിത്. ഫോസിൽ ഇന്ധനം ആവശ്യമില്ലാത്ത കാർബൺ ബഹിർഗമനം തീരെ ഇല്ലാത്തതുമായ ഈ കപ്പൽ പരിസ്ഥിതി സൗഹാർദ്ദമായ കടൽമാർഗ്ഗം സഞ്ചാരത്തിലെ വലിയ കാൽവയ്പ്പായാണ് വിലയിരുത്തപ്പെടുന്നത്. സാധാരണ കപ്പലുകളിലെ മെഷീൻ റൂമിനു പകരം കപ്പലിൽ ബാറ്ററി കംപാർട്ട്മെന്റുകളാണുണ്ടാവുക.എന്നാൽ സെൻസറുകളുടെ സഹായത്തോടെ കപ്പലിന് സ്വയം 7.5 നോട്ടിക്കൽ മൈൽ സഞ്ചരിക്കാനുള്ള സാഹചര്യമുണ്ടായ ശേഷമേ വീൽഹൗസ് പ്രവർത്തനം അവസാനിപ്പിക്കൂ. ക്യാപ്ടൻ കപ്പിൽ നിയന്ത്രിക്കുന്നത് വീൽഹൗസിലൂടെയാണ്. കപ്പലുകൾ പലപ്പോഴും ദുരന്തങ്ങൾ നേരിടേണ്ടി വരുന്നുണ്ട്. എന്നാൽ, ഇതിന്റെ ഭൂരിഭാഗവും മനുഷ്യരുടെ അശ്രദ്ധ മൂലമാണ് ഉണ്ടാകുന്നതെന്ന് പ്രൊജക്ട് മാനേജരായ ജോസ്റ്റെയൻ ബ്രാറ്റൻ പറഞ്ഞു. എന്നാൽ, സ്വയം നിയന്ത്രിതമായ കപ്പൽ സുരക്ഷിതമായ യാത്ര പ്രദാനം ചെയ്യുമെന്ന പ്രത്യാശയും അദ്ദേഹം പങ്ക് വച്ചു.
യാര ബിർക്ക്‌ലാൻഡ്
പ്രവർത്തനം ജലവൈദ്യുതിയിലൂടെ
കപ്പലിന്റെ ബാറ്ററിയ്ക്ക് 6.8 മെഗാവാട്ട് ശേഷി (100 ടെസ്ലകൾക്ക് തുല്യം)
80 മീറ്റർ ഉയരം
3,200 ടൺ ഭാരം
മലിനീകരണങ്ങളുടെ മൂന്ന് ശതമാനം സമുദ്ര മേഖലയിൽ നിന്ന്
മനുഷ്യനിർമ്മിതമായ എല്ലാ മലിനീകരണങ്ങളുടെയും മൂന്ന് ശതമാനം സംഭാവന ചെയ്യുന്നത് സമുദ്രമേഖലയാണ്. 2050 ഓടെ ഇത് 50 ശതമാനമായി കുറയ്ക്കാനാണ് ലക്ഷ്യമിടുന്നത്. 2018 ൽ മാത്രം സമുദ്രമേഖല നൂറ് കോടി ടൺ ഹരിതഗൃഹ വാതകങ്ങളാണ് പുറന്തള്ളിയത്. ഇന്റർനാഷണൽ മാരിടൈം ഓർഗനൈസേഷന്റെ കണക്കുകൾ പ്രകാരമാണിത്. ട്രക്കുകൾക്ക് പകരം കപ്പൽ ഗതാഗതം ഉപയോഗിച്ചാൽ ഒരു വർഷം പുറന്തള്ളുന്ന കാർബൺ ഡയോക്‌സൈഡിൽ 678 ടണ്ണിന്റെ കുറവ് സംഭവിക്കും.