മനോരോഗികൾക്ക് മരുന്നുമായി ശ്രീനിയേട്ടൻ വരുമെന്ന് ലൂയിസ് ടീം
മനോരോഗികൾക്കു മരുന്നുമായി നമ്മുടെ ലൂയിസ് വരും എന്ന ആമുഖത്തോടെ ലൂയിസ് ടീം സമൂഹമാദ്ധ്യമത്തിൽ പങ്കുവച്ച കുറിപ്പ് ശ്രദ്ധേയമായി. ശ്രീനിവാസന്റെ രോഗവിവരത്തെക്കുറിച്ച് തെറ്റിദ്ധാരണ പരത്തുന്ന വാർത്തകൾ പ്രചരിച്ചതിനെത്തുടർന്നായിരുന്നു ലൂയിസ് എന്ന ചിത്രത്തിന്റെ അണിയറ പ്രവർത്തകർ ഇത്തരമൊരു കുറിപ്പ് പങ്കുവച്ചത്.
പൂർണ ആരോഗ്യത്തോടെ നമ്മുടെ സ്വന്തം ശ്രീനിയേട്ടൻ ഉടൻ വരും ലൂയിസായി എന്നു പങ്കുവച്ചാണ് കുറിപ്പ് അവസാനിക്കുന്നത്.ശ്രീനിവാസൻ ടൈറ്റിൽ കഥാപാത്രത്തെ അവതരിപ്പിക്കുന്ന ചിത്രമാണ് ലൂയിസ്. ഷാബു ഉസ്മാൻ കോന്നി സംവിധാനം ചെയ്യുന്ന ചിത്രത്തിൽ ശ്രീനിവാസന്റെ രംഗങ്ങൾ മാത്രമാണ് ചിത്രീകരിക്കാൻ അവശേഷിക്കുന്നത്. വ്യത്യസ്തത നിറഞ്ഞ കഥാപാത്രത്തെയാണ് ചിത്രത്തിൽ ശ്രീനിവാസൻ അവതരിപ്പിക്കുന്നത്.മനോജ് കെ. ജയൻ , സായ് കുമാർ, ജോയ് മാത്യൂ, ഡോ. റോണി, അജിത്ത് കൂത്താട്ടുകുളം, സന്തോഷ് കീഴാറ്റൂർ, രോഹിത്, അൽസാബിദ്, ആദിനാട് ശശി, ലെന,ദിവ്യപിള്ള , സ്മിനു സിജോ, നിയ വർഗീസ്, മീനാക്ഷി, ആസ്റ്റിൻ എന്നിവരാണ് മറ്റു താരങ്ങൾ. കോട്ടുപള്ളിൽ പ്രൊഡക്ഷൻസിന്റ ബാനറിൽ ടി. ടി. എബ്രഹാം കോട്ടുപള്ളിൽ ആണ് ലൂയിസ് നിർമ്മിക്കുന്നത്.