അറിയിപ്പും ചെല്ലോഷോയുമടക്കം ഇന്ന് 67 ലോകക്കാഴ്ചകൾ

തിരുവനന്തപുരം:മഹേഷ് നാരായണൻ സംവിധാനം ചെയ്ത മലയാള ചിത്രം അറിയിപ്പ് ,ഉക്രൈൻ ചിത്രം ക്ലൊണ്ടൈക്ക്,ഹൂപ്പോ എന്നീ മത്സര ചിത്രങ്ങളടക്കം ചലച്ചിത്ര മേളയിൽ ഇന്ന് 67 സിനിമകൾ പ്രദർശിപ്പിക്കും. മത്സര വിഭാഗത്തിലെ മലയാള ചിത്രമായ അറിയിപ്പിന്റെ കേരളത്തിലെ ആദ്യപ്രദർശനമാണ് മേളയിലേത്. ഇന്ത്യയുടെ ഓസ്‌കാർ പ്രതീക്ഷ ചെല്ലോ ഷോയുടെ ആദ്യ പ്രദർശനവും ഇന്നുണ്ടാകും.

പാൻ നളിൻ സംവിധാനം ചെയ്ത ഈ ഗുജറാത്തി ചിത്രം സമയ് എന്ന ഒൻപതു വയസുകാരന് ചലച്ചിത്രങ്ങളോട് തോന്നുന്ന കൗതുകവും അടുപ്പവും വെളിച്ചത്തെ തേടിയുള്ള യാത്രയുമാണ് പ്രമേയമാക്കിയിരിക്കുന്നത്. ഇതാദ്യമായാണ് ഒരു ഗുജറാത്തി ചിത്രത്തിന് ഓസ്‌കാർ നോമിനേഷൻ ലഭിക്കുന്നത്. ഏരീസ് പ്ലക്‌സിൽ വൈകിട്ട് 5:30നാണ് പ്രദർശനം.

ലൈവ് സംഗീതത്തോടെ അവതരിപ്പിക്കുന്ന മുർണോവിന്റെ നോസ്‌ഫെറാറ്റു വൈകിട്ട് 6ന് ടാഗോറിൽ പ്രദർശിപ്പിക്കും.നിർമ്മാണത്തിന്റെ നൂറാം വാർഷികത്തിന്റെ ഭാഗമായി ചിത്രത്തിന് തത്സമയ സംഗീതം ഒരുക്കുന്നത് വിഖ്യാത സംഗീതജ്ഞൻ ജോണി ബെസ്റ്റാണ്.അന്തരിച്ച ചലച്ചിത്രപ്രതിഭ പ്രതാപ് പോത്തൻ നായകനായ കാഫിർ,ഇറാനിൽ നിരോധിക്കപ്പെട്ട ലൈലാസ് ബ്രദേഴ്‌സ് , വീറ്റ് ഹെൽമർ ചിത്രം ദി ബ്രാ,റഷ്യൻ ചിത്രം ബ്രാറ്റൻ ,ദി ബ്ലൂ കഫ്താൻ,പ്രിസൺ 77 , യു ഹാവ് ടു കം ആൻഡ് സീ ഇറ്റ്, ദി ഫോർ വാൾസ്, കൊർസാജ് , ട്രോപിക് എന്നീ ചിത്രങ്ങളുടെ പ്രദർശനവും ശനിയാഴ്ചയാണ്. മലയാളി സംവിധായകൻ പ്രതീഷ് പ്രസാദിന്റെ നോർമൽ എന്ന ചിത്രത്തിന്റെ ലോകത്തെ ആദ്യ പ്രദർശനവും ഇന്നുണ്ടാകും. ഏരീസ് പ്ലക്‌സിൽ ഉച്ചകഴിഞ്ഞു മൂന്നിനാണ് പ്രദർശനം.