മോഷണം : നാല് പേരുടെ കൈ വെട്ടി താലിബാൻ

കാബൂൾ : അഫ്ഗാനിസ്ഥാനിൽ മോഷണക്കു​റ്റം ആരോപിക്കപ്പെട്ട നാല് പേരുടെ കൈ പൊതുജന മദ്ധ്യത്തിൽ വെട്ടിമാറ്റി താലിബാന്റെ ഭീകരത. ചൊവ്വാഴ്ച കാണ്ഡഹാറിലെ അഹമ്മദ് ഷാഹി ഫുട്‌ബോൾ സ്​റ്റേഡിയത്തിൽ വച്ചാണ് സുപ്രീം കോടതി വിധി പ്രകാരം ശിക്ഷ നടപ്പാക്കിയത്. മോഷണം, പ്രകൃതിവിരുദ്ധ ലൈംഗികത തുടങ്ങിയ കുറ്റങ്ങൾ ആരോപിച്ച് ഒമ്പത് പേരെയാണ് സ്റ്റേഡിയത്തിലെത്തിച്ചത്. ഇവർക്ക് 35 - 39 തവണ ചാട്ടയടിയും നൽകി. അതേ സമയം, താലിബാന്റെ നടപടിക്കെതിരെ ശക്തമായ പ്രതിഷേധം ഉയരുന്നുണ്ട്. നടപടി ഐക്യരാഷ്ട്ര സംഘടന ( യു.എൻ ) അപലപിച്ചു. 2022 നവംബർ 18 മുതൽ അഫ്ഗാനിൽ സ്ത്രീകളടക്കം 100 ലേറെ പേർ ചാട്ടയടിക്ക് വിധേയമാക്കപ്പെട്ടെന്നാണ് റിപ്പോർട്ട്.