ഫാക്ട് തൊഴിലാളി സമരം മാറ്റില്ല

കളമശേരി: ഫാക്ട് തൊഴിലാളികൾ 8ന് സൂചനാ പണിമുടക്കും 15 മുതൽ അനിശ്ചിതകാല പണിമുടക്കും പ്രഖ്യാപിച്ചതിന്റെ അടിസ്ഥാനത്തിൽ റീജിയണൽ ജോയിന്റ് ലേബർ കമ്മിഷണറുടെ അദ്ധ്യക്ഷതയിൽ നടത്തിയ ഓൺലൈൻ ചർച്ച തീരുമാനമാകാതെ പിരിഞ്ഞു. രാസവളം മന്ത്രാലയവുമായി ബന്ധപ്പെട്ട് മറുപടി അറിയും വരെ 15 ദിവസം കൂടി സാവകാശം നൽകണമെന്ന മാനേജ്മെന്റ് നിലപാട് യൂണിയനുകൾ അംഗീകരിച്ചില്ല. പലവട്ടം മാറ്റിവച്ചതായതിനാൽ സമരവുമായി മുന്നോട്ടു പോകുമെന്ന് നേതാക്കൾ പറഞ്ഞു. മാനേജ്‌മെന്റിനുവേണ്ടി എച്ച്.ആർ. ഡെപ്യൂട്ടി ജനറൽ മാനേജർമാരായ ദിലീപ് മോഹൻ, മരിയ വർഗീസ്, നേതാക്കളായ കെ.ചന്ദ്രൻ പിള്ള, എം.എം.ജബ്ബാർ, പി.വി.ജോസ്, വി.എ.നാസർ, പി.കെ.സത്യൻ, മാർഷൽ, ജോർജ്തോമസ് തുടങ്ങിയവർ പങ്കെടുത്തു.