കാറ്റിലും മഴയിലും ഇലക്ട്രിക് പോസ്റ്റുകൾ ഒടിഞ്ഞു വീണു

തൊടുപുഴ: ശക്തമായ കാറ്റിലും മഴയിലും കരിമണ്ണൂർ പഞ്ചായത്തിലെ വിവിധയിടങ്ങളിൽ മരം കടപുഴകി ഇലക്ട്രിക് പോസ്റ്റുകൾ ഒടിഞ്ഞു വീണു. കരിമണ്ണൂർ പന്നൂർ റൂട്ടിലായിരുന്നു ഇന്നലെ ഉച്ചയ്ക്ക് ശേഷം നാശനഷ്ടമുണ്ടായത്. പാതയോരത്ത് നിന്ന അഞ്ഞിലി റബർ അടക്കമുള്ള മരങ്ങൾ കടപുഴകി വീണാണ് നാലോളം ഇലക്ട്രിക് പോസ്റ്റുകൾ ഒടിഞ്ഞത്. ഇതോടെ മേഖലയിലെ വൈദ്യുതവിതരണം താറുമാറായി. തൊടുപുഴ ഫയർഫോഴ്സ് എത്തിയാണ് ഗതാഗതം പുനഃസ്ഥാപിച്ചത്. കൂടാതെ പലയിടത്തും വ്യാപകമായി കൃഷിനാശവും ഉണ്ടായിട്ടുണ്ട്.