കൊല്ലം: ലോകത്തിൽ ഏറ്റവും കൂടുതൽ മരണങ്ങൾ സംഭവിക്കുന്നത് ഹൃദ്രോഗത്തെ തുടർന്നാണെന്നും ജീവിതശൈലീ രോഗങ്ങളിൽ എല്ലാവരും നിയന്ത്രണം കൊണ്ടുവരാൻ ശ്രമിക്കണമെന്നും മന്ത്രി വീണാജോർജ് പറഞ്ഞു. ലോക ഹൃദയ ദിനത്തോടനുബന്ധിച്ച് 'കേരളകൗമുദി' കൊല്ലം യൂണിറ്റിന്റെ നേതൃത്വത്തിൽ സംഘടിപ്പിച്ച ഹൃദയദിനാചരണവും ഡോക്ടർമാർക്ക് ആദരവും പരിപാടി ഓൺലൈനായി ഉദ്ഘാടനം ചെയ്യുകയായിരുന്നു മന്ത്രി.
ജീവിതശൈലീ രോഗ നിയന്ത്രണത്തിനായി സംസ്ഥാന സർക്കാരിന്റെ നേതൃത്വത്തിൽ കാമ്പയിൻ സംഘടിപ്പിക്കും. പ്രധാന ശ്രദ്ധ ചെലുത്തേണ്ട ഒന്നാണ് ഹൃദയത്തിന്റെ ആരോഗ്യം. ഈ ബോധവത്കരണത്തിന്റെ ഭാഗമായ ഹൃദയദിനത്തിൽ ഡോക്ടർമാരെ ആദരിക്കുന്ന ചടങ്ങ് സംഘടിപ്പിച്ച കേരളകൗമുദി കൊല്ലം യൂണിറ്റ് അഭിനന്ദനം അർഹിക്കുന്നുവെന്നും മന്ത്രി പറഞ്ഞു. കൊല്ലം ഹോട്ടൽ സീ പാലസ് കോൺഫറൻസ് ഹാളിൽ നടന്ന ചടങ്ങിൽ കേരളകൗമുദി റസിഡന്റ് എഡിറ്ററും കൊല്ലം യൂണിറ്റ് ചീഫുമായ എസ്. രാധാകൃഷ്ണൻ അദ്ധ്യക്ഷത വഹിച്ചു. കെ. സോമപ്രസാദ് എം.പി ഡോക്ടർമാരെ ആദരിച്ചു. അസി. കളക്ടർ ഡോ. അരുൺ. എസ്. നായർ മുഖ്യാതിഥിയായി. കേരളകൗമുദി കൊല്ലം ബ്യുറോ ചീഫ് ബി. ഉണ്ണിക്കണ്ണൻ സ്വാഗതവും സ്പെഷ്യൽ കറസ്പോണ്ടന്റ് സാം ചെമ്പകത്തിൽ നന്ദിയും പറഞ്ഞു.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |