മയക്കുമരുന്നിനെതിരെ തെരുവ് നാടകം

പുത്തൂർ: വെണ്ടാർ ശ്രീവിദ്യാധിരാജ വൊക്കേഷണൽ ഹയർ സെക്കൻഡറി സ്കൂളിലെ നാഷണൽ സർവീസ് സ്കീമിന്റെ നേതൃത്വത്തിൽ മയക്കുമരുന്നിനെതിരെ സംഘടിപ്പിച്ച തെരുവ് നാടകം ഹിറ്റായി. പുത്തൂർ മണ്ഡപം ജംഗ്ഷനിലാണ് തെരുവ് നാടകം ആദ്യം അവതരിപ്പിച്ചത്. ഗാന്ധി ജയന്തി മുതൽ കേരളപ്പിറവി ദിനംവരെ നീണ്ടുനിൽക്കുന്ന മയക്കുമരുന്നിനെതിരെയുള്ള പ്രചാരണത്തിന്റെ ഭാഗമായിട്ടാണ് എൻ.എസ്.എസ് വോളണ്ടിയർമാരുടെ നേതൃത്വത്തിൽ തെരുവ് നാടകവും നൃത്തശില്പവും മറ്റ് കലാപരിപാടികളും അവതരിപ്പിക്കുന്നത്. പുത്തൂരിൽ നിന്ന് തുടങ്ങിയ പ്രചരണ സന്ദേശയാത്ര ജില്ലാ പഞ്ചായത്തംഗം ആർ.രശ്മി ഉദ്ഘാടനം ചെയ്തു. ശ്രീവിദ്യാധിരാജ മാനേജർ ഗൗതംകൃഷ്ണ അദ്ധ്യക്ഷനായി. പി.ടി.എ പ്രസിഡന്റ് മഠത്തിനപ്പുഴ അജയകുമാർ,​ പ്രിൻസിപ്പൽ ടി.രാജേഷ്,​ പി.എ.സജിമോൻ,​ പ്രോഗ്രാം ഓഫീസർ ബി.വി.സുനിത,​ സജീവ്,​ ജ്യോതി.എസ്.നായർ,​ അരുൺ മുരളി എന്നിവർ സംസാരിച്ചു. കലാ പരിപാടികൾക്ക് ശേഷം കാഴ്ചക്കാരെക്കൂടി പങ്കെടുപ്പിച്ച് മനുഷ്യച്ചങ്ങലയും തീർത്തു. കൊട്ടാരക്കര കെ.എസ്.ആർ.ടി.സി ബസ് സ്റ്റാൻഡിൽ എത്തിയ കലാജാഥയുടെ സമാപന പരിപാടികൾ ഡിവൈ.എസ്.പി ജി.ഡി.വിജയകുമാർ ഉദ്ഘാടനം ചെയ്തു.