കാഞ്ഞിരപ്പള്ളിയിൽ ട്രാഫിക് എൻഫോഴ്‌സ്‌മെന്റ് യൂണിറ്റ്

കാഞ്ഞിരപ്പള്ളി: ടൗണിലെ തിരക്കും ഗതാഗതക്കുരുക്കും നിയന്ത്രിക്കാൻ നിലവിലുള്ള സംവിധാനം അപര്യാപ്തമായതിനാൽ കാഞ്ഞിരപ്പള്ളിയിൽ ട്രാഫിക് എൻഫോഴ്‌സ്‌മെന്റ് യൂണിറ്റ് അനുവദിക്കുമെന്ന് ഗവ.ചീഫ് വിപ്പ് ഡോ.എൻ.ജയരാജ് അറിയിച്ചു. ശബരിമല തീർത്ഥാടനകാലത്തെ 90 ശതമാനത്തോളം വാഹനങ്ങളും കടന്നു പോകുന്നത് കാഞ്ഞിരപ്പള്ളി ടൗൺ വഴിയാണ്. നിലവിലുള്ള പൊലീസ് സ്റ്റേഷനിലെ അംഗബലം കൊണ്ട് ഈ സാഹചര്യം കൈകാര്യം ചെയ്യാൻ ബുദ്ധിമുട്ടാണ്. അതിനാൽ കാഞ്ഞിരപ്പള്ളി കേന്ദ്രീകരിച്ച് ഒരു ട്രാഫിക് പൊലീസ് സ്റ്റേഷൻ അനുവദിക്കണമെന്ന് ആവശ്യപ്പെട്ട് മുഖ്യമന്ത്രിക്ക് ചീഫ് വിപ്പ് നിവേദനം നൽകിയിരുന്നു. ഇത് സംബന്ധിച്ച സമഗ്ര നിർദേശം സർക്കാരിന്റെ പരിഗണനയിലാണെന്നും ചീഫ് വിപ്പ് അറിയിച്ചു.