തിരുവല്ല : കൊവിഡ് മഹാമാരിയുടെ ദുരിതങ്ങൾക്കിടെ കായികമേഖലയ്ക്ക് ഉണർവേകിയ ജില്ലാ ഒളിമ്പിക്സ് കായികമേളയ്ക്ക് സമാപനമായി. ജില്ലാ ഒളിമ്പിക്സ് അസോസിയേഷന്റെ ആഭിമുഖ്യത്തിൽ പത്ത് ദിവസങ്ങളിലായി നടന്നുവന്ന ഒന്നാമത് ഒളിമ്പിക്സ് കായികമേളയ്ക്ക് തിരുവല്ലയിലാണ് കൊടിയിറങ്ങിയത്. സമാപനസമ്മേളനം ജില്ലാസ്പോർട്സ് കൗൺസിൽ പ്രസിഡന്റ് ആർ.അനിൽ കുമാർ ഉദ്ഘാടനം ചെയ്തു. ജില്ലാ ഒളിമ്പിക് അസോസിയേഷൻ സെക്രട്ടറി ആർ.പ്രസന്നകുമാർ അദ്ധ്യക്ഷത വഹിച്ചു. പ്രസിഡന്റ് അഡ്വ.കെ.പ്രകാശ് ബാബു, ജോ.സെക്രട്ടറി സനൽ ജി.പണിക്കർ, ടെന്നീസ് അസോസിയേഷൻ ജില്ലാസെക്രട്ടറി കുര്യൻ ഫിലിപ്പ്, ജില്ലാ ബോക്സിംഗ് അസോസിയേഷൻ സെക്രട്ടറി അഡ്വ. ദാനിയേൽ തോമസ് കാരിക്കോട്ട്, മാത്യൂസ് ജേക്കബ്, ജോയി പൗലോസ്, ബേബിക്കുട്ടി എന്നിവർ പ്രസംഗിച്ചു.
ടേബിൾ ടെന്നീസ് സിംഗിൾസ് പുരുഷ, വനിതാവിഭാഗങ്ങളിലായി നടന്ന മത്സരത്തിൽ യഥാക്രമം മാത്യൂസ് നൈനാൻ കൊച്ചിയിലും ബീനാ സാറാഐപ്പും ചാമ്പ്യന്മാരായി. പത്തനംതിട്ട, തിരുവല്ല, റാന്നി, ഇരവിപേരൂർ, പന്തളം എന്നിവിടങ്ങളിൽ ഒരാഴ്ചയിലേറെയായി നടന്ന മത്സരങ്ങളിലെ വിജയികൾക്ക് ജില്ലാസ്പോർട്സ് കൗൺസിൽ പ്രസിഡന്റ് ആർ.അനിൽകുമാർ, ജില്ലാഒളിമ്പിക് അസോസിയേഷൻ സെക്രട്ടറി ആർ. പ്രസന്നകുമാർ എന്നിവർ ചേർന്ന് ട്രോഫികൾ വിതരണം ചെയ്തു.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |