തൃശൂർ : ഇടതുപക്ഷ സർക്കാരിന്റെ ഒന്നാം വാർഷികം വിനാശകരമായ വികസനങ്ങളുടെ വർഷമായി ആചരിക്കുന്നതിന്റെ ഭാഗമായി യു.ഡി.എഫിന്റെ ആഭിമുഖ്യത്തിൽ ഇന്ന് ജില്ലയിലെ മുഴുവൻ പഞ്ചായത്ത് കേന്ദ്രങ്ങളിലും സത്യഗ്രഹ സായാഹ്ന സമര പരിപാടികൾ സംഘടിപ്പിക്കും. ജില്ലാതല ഉദ്ഘാടനം തൃശൂർ പടിഞ്ഞാറേ കോട്ടയിൽ മുൻ മുഖ്യമന്ത്രി ഉമ്മൻ ചാണ്ടി ഉദ്ഘാടനം ചെയ്യും. യു.ഡി.എഫ് ജില്ലാ ചെയർമാൻ ജോസഫ് ചാലിശ്ശേരി അദ്ധ്യക്ഷത വഹിക്കും. നാല് മുതൽ ആറ് വരെ നീണ്ടുനിൽക്കുന്നതാണ് സമര പരിപാടിയെന്ന് ഡി.സി.സി പ്രസിഡന്റ് ജോസ് വള്ളൂർ അറിയിച്ചു.
മൺപാത്ര നിർമ്മാണ സമുദായ സഭ
സംസ്ഥാന സമ്മേളനം
തൃശൂർ : കേരള മൺപാത്ര നിർമ്മാണസമുദായ സഭ (കെ.എം.എസ്.എസ് ) സംസ്ഥാന സമ്മേളനം 21, 22 തിയതികളിൽ തൃശൂരിൽ നടക്കും. 21ന് രാവിലെ 9ന് ചിറ്റിശ്ശേരി എം.കെ.മാണിക്യൻ സ്മാരക ഹാളിൽ മന്ത്രി കെ.രാജൻ സമ്മേളനം ഉദ്ഘാടനം ചെയ്യും. സംസ്ഥാന പ്രസിഡന്റ് സുഭാഷ് ബോസ് ആറ്റുകാൽ അദ്ധ്യക്ഷത വഹിക്കും.
വനിതാ സമ്മേളനം 22ന് രാവിലെ 9ന് കെ.ടി.മുഹമ്മദ് സ്മാരക റീജ്യണൽ തിയേറ്ററിൽ മന്ത്രി ഡോ.ആർ.ബിന്ദു ഉദ്ഘാടനം ചെയ്യും. സംസ്ഥാന വേദി പ്രസിഡന്റ് ശാന്ത മാച്ചൻ അദ്ധ്യക്ഷത വഹിക്കുമെന്ന് സംസ്ഥാന പ്രസിഡന്റ് സുഭാഷ് ബോസ്, ജനറൽ സെക്രട്ടറി രാജേഷ് പാലങ്ങാട്ട്, ഓർഗനൈസിംഗ് സെക്രട്ടറി എം.കെ.ചന്ദ്രൻ, ശാന്ത മാച്ചൻ എന്നിവർ അറിയിച്ചു.
മാർച്ച് പാസ്റ്റിൽ മന്ത്രി കെ.രാജൻ പതാക ഉയർത്തും
തൃശൂർ : സംസ്ഥാന റവന്യൂ കായികോത്സവത്തിന്റെ ഭാഗമായി ഇന്ന് നടത്തുന്ന മാർച്ച് പാസ്റ്റിൽ മന്ത്രി കെ.രാജൻ സല്യൂട്ട് സ്വീകരിച്ച് പതാക ഉയർത്തും. രാവിലെ 8ന് കിഴക്കേകോട്ട തോപ്പ് സ്റ്റേഡിയത്തിൽ നടക്കുന്ന മാർച്ച് പാസ്റ്റിൽ 15 ടീമുകൾ അണിനിരക്കും. തുടർന്ന് അത്ലറ്റിക്സ് മത്സരങ്ങൾ നടക്കും. റവന്യൂ കായികോത്സവം ജില്ലാതല മത്സരങ്ങളിൽ വിജയിച്ച 14 ടീമും ഒരു ഹെഡ് ക്വാർട്ടേഴ്സ് ടീമും അടങ്ങുന്ന പതിനഞ്ച് ടീമുകളാണ് മാർച്ച് പാസ്റ്റിൽ പങ്കെടുക്കുന്നത്. നാൽപ്പത് വയസ് വരെയുള്ളവർക്കും മുകളിലുള്ളവർക്കും ഈ വിഭാഗങ്ങളിൽ സ്ത്രീകൾക്കും പുരുഷന്മാർക്കുമായും വെവ്വേറെ മത്സരം നടക്കും. 100, 400, 1500 മീറ്റർ വിഭാഗങ്ങളിൽ ഓട്ടമത്സരം, ലോംഗ്ജെമ്പ്, ഷോട്ട്പുട്ട് (പുരുഷൻ 7.25 കിലോ, സ്ത്രീ 4 കിലോ) എന്നീ ഇനങ്ങളിലാണ് മത്സരം നടക്കുക. മേയ് 21, 22 തിയതികളിൽ കോർപറേഷൻ സ്റ്റേഡിയത്തിൽ ഫുട്ബാൾ മത്സരങ്ങളും ഉണ്ടാകും.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |