14 വർഷമായി പ്രവാസി, ഒടുവിൽ ഒറ്റയ്ക്കെടുത്ത ടിക്കറ്റിൽ കോടികളുടെ സമ്മാനം

അബുദാബി: യുഎഇ ബിഗ് ടിക്കറ്റ് നറുക്കെടുപ്പിൽ വീണ്ടും ഭാഗ്യം തുണച്ചത് ഇന്ത്യക്കാരിയെ. ദുബായിൽ താമസിക്കുന്ന തമിഴ്‌നാട് സ്വദേശി ചൈതന്യ കുമാ‌രി രാമചന്ദ്രനാണ് ഇത്തവണത്തെ ഭാഗ്യശാലി. 14 വർഷമായി യുഎഇയിൽ കമ്പ്യൂട്ടർ എ‌ഞ്ചിനീയറായി ജോലി ചെയ്യുകയാണ് ചൈതന്യ. ബിഗ് ടിക്കറ്റിലൂടെ പത്ത് ലക്ഷം ദിർഹമാണ് (ഏകദേശം രണ്ട് കോടി രൂപ) ചൈതന്യക്ക് സമ്മാനമായി ലഭിക്കുന്നത്.

ആറാം തവണയാണ് ചൈതന്യ ബിഗ് ടിക്കറ്റ് എടുക്കുന്നത്. മുൻപ് സഹപ്രവർത്തകർക്കൊപ്പം എടുത്തിരുന്നെങ്കിലും ഭാഗ്യം തുണച്ചില്ല. ഇത്തവണ ഒറ്റയ്ക്കാണ് ചൈതന്യ ടിക്കറ്റെടുത്തത്. സമ്മാനത്തുക മകളുടെ നിയമപഠനത്തിനായി മാറ്റി വയ്ക്കുമെന്ന് ചൈതന്യ പറഞ്ഞു. പതിനൊന്നാം ക്ളാസുകാരിയാണ് മകളിപ്പോൾ. മകളെ യുകെയിലോ ഓസ്‌ട്രേലിയയിലോ ഉപരിപഠനത്തിനായി അയക്കണമെന്നാണ് ചൈതന്യയുടെ ആഗ്രഹം. സിംഗിൾ മദർ എന്ന നിലയിൽ ഒരുപാട് വെല്ലുവിളികൾ നേരിട്ടിട്ടുണ്ടെന്നും അതിനാൽ സമ്മാനത്തുക ആഡംബരങ്ങൾക്കായി ചെലവാക്കില്ലെന്നും അവർ പറഞ്ഞു.

നിലവിൽ ചൈതന്യ സ്വദേശത്താണുള്ളത്. സമ്മാനമടിച്ച വിവരം അറിയിക്കാൻ ബിഗ് ടിക്കറ്റ് അധികൃതർ വിളിച്ചെങ്കിലും സ്‌പാം കോൾ ആണെന്ന് കരുതി എടുത്തില്ല. പിന്നീട് ദുബായിലുള്ള സുഹൃത്ത് വിളിച്ച് വിവരം അറിയിക്കുകയായിരുന്നു. ബിഗ് ടിക്കറ്റ് വെബ്‌സൈറ്റിലും ഇമെയിലും പരിശോധിച്ചാണ് ഉറപ്പ് വരുത്തിയത്. മാതാപിതാക്കളോട് പറഞ്ഞപ്പോൾ തമാശയാണെന്നാണ് അവർ കരുതിയതെന്നും ചൈതന്യ പറഞ്ഞു. നാട്ടിൽ വാങ്ങിയ കാറിന്റെ ബാങ്ക് വായ്‌പ അടച്ചുതീർക്കാനുണ്ടെന്നും ചൈതന്യ പറഞ്ഞു.