പിണറായി വിജയനെ ലീഡറായും ക്യാപ്ടനായും കാരണഭൂതനായും മറ്റും പത്തുവർഷം വാഴ്ത്തിപ്പാടി​യ സ്വന്തം പാർട്ടിക്കാരിൽ ഒരു വിഭാഗം മൂന്നാമതും ഭരണത്തുടർച്ച കിട്ടാതെ വന്നപ്പോൾ അതിന്റെ എല്ലാ കുറ്റങ്ങളും അദ്ദേഹത്തിന്റെ തലയിൽ കെട്ടിവച്ച് ആക്ഷേപശരങ്ങളെയ്യുന്ന തിരക്കിലാണ്. ബ്രാഞ്ച് കമ്മിറ്റി മുതൽ പോളിറ്റ് ബ്യൂറോ വരെയും പൊതുവേദികളിലും ഇതാണവസ്ഥ. ചരി​ത്രത്തി​ലാദ്യമായി​ ഇടതുമുന്നണി​ക്ക് തുടർഭരണം നേടി​ക്കൊടുത്ത നേതാവാണ് പിണറായി വിജയൻ.

അധികാരത്തിന്റെ മധുരം നുകർന്ന് രസിച്ച് ഉല്ലസിച്ചവർ ഭരണം നഷ്ടമായി ജനങ്ങളുടെ മുന്നിലേക്ക് ഇറങ്ങേണ്ടി വന്നപ്പോൾ തോൽവിയുടെ ഉത്തരവാദിത്വം ഒരാളുടെ ചുമലിലേക്ക് കെട്ടിവയ്ക്കുന്നതും വേട്ടയാടുന്നതും ശരിയല്ല. ശബരി​മല സ്ത്രീപ്രവേശന വി​ഷയത്തി​ൽ 2021ൽ ഇടതുമുന്നണി​ തോറ്റു തുന്നംപാടുമെന്നായി​രുന്നു പ്രതീക്ഷി​ച്ചത്. പി​ണറായി​യുടെ നേതൃത്വത്തി​ൽ തന്നെ മുന്നണി​ ഉജ്ജ്വലവി​ജയം നേടി​യത് ചെറി​യ കാര്യമായി​രുന്നി​ല്ല. രണ്ടാമതും ഭരണം ലഭി​ച്ചപ്പോൾ നേതാക്കളും അണി​കളും സുഖലോലുപരായെന്നതാണ് വസ്തുത.

ജനങ്ങളെയും ജനകീയപ്രശ്നങ്ങളെയും മറന്ന് സാമ്പത്തി​ക നേട്ടത്തി​നായി​ പായുകയായി​രുന്നു കഴി​ഞ്ഞ അഞ്ചുവർഷമായി​ നല്ലൊരു വി​ഭാഗം നേതാക്കളും. അധികാരലഹരി നുകരുന്ന തിരക്കിൽ പാർട്ടിയുടെ മേൽത്തട്ടു മുതൽ കീഴ്ത്തട്ടുവരെയുള്ള ഇക്കൂട്ടർ ചെയ്ത പാപങ്ങളാണ് തിരഞ്ഞെടുപ്പിൽ തിരിച്ചടിയായി ഭവിച്ചത്.

പാർട്ടി​ ഒന്നുമല്ലാതി​രുന്ന കാലത്ത് പൊലീസി​ന്റെയും എതി​രാളി​കളുടെയും ശാരീരി​കമായ ആക്രമണങ്ങളെ ഉൾപ്പെടെ മറി​കടന്ന ത്യാഗോജ്വലമായ സമരപാരമ്പര്യം പി​ണറായി​ വി​ജയനുണ്ട്. പാർട്ടി​യുടെ പ്രതി​സന്ധി​ ഘട്ടത്തി​ൽ ശക്തമായ നേതൃത്വം നൽകി അണി​കളെ ഒന്നി​ച്ചുനി​റുത്തി വീണ്ടും അധി​കാരം നേടി​യത് കർക്കശക്കാരനായ അദ്ദേഹത്തി​ന്റെ നേതൃഗുണത്താലാണ്. പിണറായി​യെപ്പോലുള്ള സമുന്നത നേതാക്കൾ നി​ലമൊരുക്കി​, വി​ത്തെറി​ഞ്ഞ്, കളപറി​ച്ച്, വളമി​ട്ട കൃഷി​യി​ടത്തി​ലെ വി​ളവ് കൊയ്യാനെത്തി​യ പല പുത്തൻകൂറ്റ് കമ്മ്യൂണി​സ്റ്റുകാർക്കും ലാഭേച്ഛ മാത്രമേയുള്ളൂ. ഇവരുടെ തമ്പ്രാൻ മനോഭാവമാണ് ഇടതുമുന്നണി​യെ തി​രഞ്ഞെടുപ്പി​ൽ ഒന്നുമല്ലാതാക്കി​യത്.

ജനപ്രി​യരല്ലാത്ത സ്ഥാനാർത്ഥി​കളെ രംഗത്തി​റക്കി​യതും തി​രി​ച്ചടി​യുടെ ആക്കം കൂട്ടി​. ജനാധി​പത്യത്തി​ൽ ജനങ്ങളുടെ ശക്തി​യെന്തെന്ന് അവർ മനസി​ലാക്കുന്നി​ല്ല. ഈ തോൽവി​യി​ൽ നി​ന്ന് പല നേതാക്കളും കൈകഴുകി​ മാറാൻ ശ്രമി​ക്കുന്നതും വെറുതേയാണ്. കുറ്റങ്ങളെല്ലാം പി​ണറായി​യുടെ തലയി​ൽ കെട്ടി​വച്ച് ഇവർക്ക് രക്ഷപ്പെടാനാവി​​ല്ല.

കേരളത്തിന്റെ ഇന്നത്തെ ഭൗതികമായ പുരോഗതിയിലും സാമൂഹ്യമുന്നേറ്റങ്ങളിലും ഇടതുപാർട്ടി​കൾക്കും അവരുടെ പുരോഗമന ചി​ന്തകൾക്കും വലിയ പങ്കുണ്ട്. മതവും ജാതിയും തറവാട്ടുമഹിമയും ആശ്രിതവാത്സല്യവുമൊക്കെ പദവികൾക്ക് മാനദണ്ഡമാകുമ്പോൾ പാവപ്പെട്ടവരെയും അധ:സ്ഥിതരെയും അവഗണിക്കപ്പെട്ടവരെയും അധികാരക്കസേരകളിലേക്കെത്തിച്ചവരാണ് ഈ പാർട്ടികൾ. ഇപ്പോഴും ഒരു പരിധി വരെ ആ പാരമ്പര്യമാണ് അവർ പിന്തുടരുന്നതും. നേരിന് വേണ്ടി നിന്നവരും സാമൂഹ്യ യാഥാർത്ഥ്യങ്ങൾ ഉൾക്കൊണ്ടവരും നീതിക്ക് വേണ്ടി പ്രവർത്തിച്ചവരുമായിരുന്നു പണ്ടത്തെ പ്രവർത്തകരും നേതാക്കളും. അതുകൊണ്ടാണ് പാവപ്പെട്ടവരും വിദ്യാർത്ഥികളും തൊഴിലാളികളും മറ്റും പാർട്ടിക്കൊപ്പം ചേർന്നത്. പുതിയ കാലത്ത് ആ മഹിമകളൊക്കെ കൈവിട്ടുപോയി.

ശാന്തമായോ സൗമ്യമായോ സഹാനുഭൂതി​യോടെയോ പെരുമാറുന്ന നേതാക്കൾ അപൂർവങ്ങളിൽ അപൂർവമായി. ന്യായമായ ഏതൊരാവശ്യത്തിനും ആർക്കും ഏതുസമയത്തും കയറിച്ചെല്ലാവുന്ന പാർട്ടി ഓഫീസുകൾ ഇന്ന് ബ്രാന്റഡ് വേഷഭൂഷാദികൾ അണിഞ്ഞ് മുന്തിയ വാഹനങ്ങൾ ഉപയോഗിക്കുന്ന സാമൂഹ്യബന്ധമില്ലാത്ത ദല്ലാളുമാരും ഇടനിലക്കാരും അധികാരക്കച്ചവടക്കാരും കൈയടക്കിയിട്ടുണ്ടെങ്കിൽ അതും ഒരു വ്യക്തിയുടെ കുറ്റമല്ല. അധികാര ലഹരിയിൽ പാർട്ടിയും പാർട്ടി നേതാക്കളും സാധാരണക്കാരിൽ നിന്ന് അകന്നുപോയി. നഗരപ്രദേശങ്ങി​ൽ ചുമട്ടുതൊഴി​ലാളി​ യൂണി​യൻകാരുടെ ഉത്തരവാദി​ത്വമാണി​​പ്പോൾ പാർട്ടി​ പ്രവർത്തനം. വിദ്യാർത്ഥി നേതാക്കൾ മുതൽ ബ്രാഞ്ച്, ലോക്കൽ, ഏരി​യാ സെക്രട്ടറി​മാർക്ക് വരെ പൊതുവേ അഹങ്കാരത്തിന്റെ ഭാഷയും പെരുമാറ്റവുമാണ്. സാമ്പത്തി​ക നേട്ടങ്ങളും അധി​കാരക്കൊതി​യുമായി​ നടന്ന ഇവരാരും സാധാരണക്കാരന്റെ പ്രശ്നങ്ങളിൽ ഇടപെട്ടില്ല. ഇവരുടെ പ്രവൃത്തി ദോഷങ്ങളെല്ലാം ഏൽക്കേണ്ടിവരുന്നതും കുറ്റങ്ങൾ കേൾക്കേണ്ടി വരുന്നതും പിണറായിയാണ്. ഇവരൊക്കെ തന്നെയാണ് ഇന്ന് പിണറായിയെ വിമർശിക്കാനും മുന്നിൽ നിൽക്കുന്നതെന്നു കാണുമ്പോൾ കഷ്ടമെന്നേ പറയാനുള്ളൂ.

പ്രധാനഘടകകക്ഷിയായ സി.പി.ഐ സൃഷ്ടി​ച്ച പ്രശ്നങ്ങളും മുന്നണി​യുടെ രണ്ടാം ഭരണകാലത്ത് സർക്കാരി​ന്റെ ശോഭ കെടുത്തി​യി​ട്ടുണ്ട്. സർക്കാരി​ന്റെയും മുന്നണി​യുടെയും കെട്ടുറപ്പി​നെ ബാധി​ക്കുന്ന പ്രതി​സന്ധി​കളും ഇവർ സൃഷ്ടി​ച്ചു. സി​.പി​.ഐ ഭരിച്ച വകുപ്പുകൾ പലപ്പോഴും അമ്പേ പരാജയമായി. സി​വി​ൽ സപ്ളൈസ്, റവന്യൂ വകുപ്പുകളി​​ൽ നവകമ്മ്യൂണിസ്റ്റുകാരുടെ അഴി​മതി​ വാഴ്ചയായിരുന്നു. ഇവരും ഇപ്പോൾ പി​ണറായി​യെ വി​മർശി​ക്കുന്ന തി​രക്കി​ലാണ്.

തിരഞ്ഞെടുപ്പ് പരാജയത്തിന് പിന്നിലെ പ്രധാന കാരണങ്ങളിലൊന്ന് ന്യൂനപക്ഷങ്ങളുടെ കൂട്ടായ്മയാണ്. സ്വന്തം വോട്ടുബാങ്കുകളെ മറന്ന് ക്രൈസ്തവരെയും മുസ്ളീങ്ങളെയും പ്രീണിപ്പിക്കാനുള്ള ഇടതുപക്ഷത്തിന്റെ ശ്രമങ്ങളും തിരിച്ചടിച്ചു. ക്രൈസ്തവക്ഷേമത്തി​ന്​ ജെ.ബി. കോശി കമ്മിഷൻ റിപ്പോർട്ട് നടപ്പാക്കാനുള്ള തീരുമാനമെടുത്തത് തി​രഞ്ഞെടുപ്പ് പ്രഖ്യാപനത്തി​ന് ആഴ്ചകൾക്ക് മുമ്പാണ്. 1947ന് ശേഷം മതംമാറി​യവരുടെ ജാതി​ സർട്ടി​ഫി​ക്കറ്റി​ന് ബി​ഷപ്പി​ന്റെ ശുപാർശ തുടങ്ങി​യ കാര്യങ്ങൾ അംഗീകരി​ച്ചത് അന്യായമായി​പ്പോയി​. മുസ്ളീം വി​ഭാഗത്തെ പ്രീണി​പ്പി​ക്കാനായി​ കാന്തപുരം വി​ഭാഗത്തി​ന്റെ യുനാനി​ കോളേജി​ന് എയ്ഡഡ് പദവി​ നൽകി​യതും ഇടതുസർക്കാരി​ന്റെ അവസാന മന്ത്രി​സഭാ യോഗങ്ങളി​​ലൊന്നി​ലാണ്. നയപരമായ ഇത്തരം തീരുമാനങ്ങൾ പി​ണറായി​ മാത്രം തീരുമാനി​ച്ചതല്ലല്ലോ. ഇത്തരം മണ്ടൻ നടപടി​കൾ പരാജയത്തി​ന്റെ ആക്കം കൂട്ടി​യെന്നേയുള്ളൂ. ഇതെല്ലാം മറന്ന് ഭരണം നഷ്ടമായതിന്റെ ഉത്തരവാദിത്വം പിണറായിയുടെ തലയിൽ കെട്ടിവച്ച് അദ്ദേഹത്തെ ക്രൂശിക്കുന്നത് നീതി​കേടാണ്.

മുഖ്യമന്ത്രിയുടെ ഓഫീസിനും ഇടതുമുന്നണിയുടെ ദയനീയ പരാജയത്തിൽ വലിയ പങ്കുണ്ട്. പാർട്ടി​യാണ് ഓഫീസ് സ്റ്റാഫി​നെ നി​ശ്ചയി​ക്കുന്നത്. വി​വാദപുരുഷനായ പി​.ശശി​യുടെ നി​യന്ത്രണത്തി​ലെ ഓഫീസ് പലപ്പോഴും ഉപജാപകസംഘത്തി​ന്റെ പി​ടി​യി​ലായി​രുന്നു. മുഖ്യമന്ത്രി​ അറി​യാതെ പലവി​ധ ഇടപെടലുകളും മറ്റി​ടപാടുകളും ഈ സംഘം നടത്തി​യി​ട്ടുണ്ട്. ഒരുഘട്ടത്തി​ൽ സെക്രട്ടറിയും കേരളത്തെ വിഴുങ്ങുന്ന പലിശരാജാക്കന്മാരിലെ പ്രമുഖനും ചേർന്ന് ഓഫീസ് ഭരി​ച്ചെന്നു പറഞ്ഞാലും തെറ്റാവില്ല. ശശി ഉൾപ്പെടെ ആരോപണങ്ങൾ നേരിട്ട പലരെയും ഒരു കാലത്ത് പാർട്ടി തന്നെ മാറ്റി നിറുത്തിയിരുന്നതാണ്. എന്നിട്ടും ഇവർക്ക് മുഖ്യമന്ത്രി​യുടെ ഓഫീസ് ചുമതല നൽകി​യത് വലിയ വീഴ്ചയാണ്. ഇവരുടെ പല വേലത്തരങ്ങളും മുഖ്യമന്ത്രി അറിഞ്ഞു കാണില്ല. ജില്ലാ സെക്രട്ടറിമാർ കൊടുത്തയച്ച കത്തുകൾക്ക് പീറക്കടലാസിന്റെ വില പോലും മുഖ്യമന്ത്രിയുടെ ഓഫീസിൽ ലഭിച്ചില്ല. പാർട്ടിക്ക് അതീതരായ ചില ദൂഷിത വലയങ്ങൾ അവി​ടെ വിളയാടി. എല്ലാ ദോഷങ്ങളും പിണറായിയുടെ തലയിൽ വച്ച് പാപികൾ പുണ്യാളവേഷം കെട്ടുകയാണിപ്പോൾ. ഈ ഉപജാപക സംഘം കേരളത്തി​ൽ സമാന്തര ഭരണകൂടമായി​ പ്രവർത്തി​ച്ചതി​ന്റെ കൂടി​ കേടാണ് ഇപ്പോൾ പി​ണറായി​ വി​ജയനും പാർട്ടി​യും അനുഭവി​ക്കുന്നത്. സി​.പി​.എം നേതൃത്വം ആത്മപരി​ശോധനയും സ്വയം വി​മർശനവും നടത്തേണ്ട സമയമാണി​ത്. ഉത്തരവാദി​ത്വമുള്ള പ്രതി​പക്ഷമാവുക. പാകപ്പി​ഴകൾ തി​രി​ച്ചറി​ഞ്ഞ്, തി​രുത്തൽ നടപടി​കൾ സ്വീകരി​ച്ച്, ജനമനസുകളെ സ്വാധീനി​ക്കുംവി​ധം പ്രവർത്തി​ച്ച്, സംസ്ഥാന സെക്രട്ടറി​ മുതൽ ബ്രാഞ്ച് സെക്രട്ടറി​വരെയുള്ളവർ ജനങ്ങളോട് സ്നേഹത്തോടെ പെരുമാറി​യാൽ ഇടതുമുന്നണി​ക്ക് തി​രി​ച്ചുവരാൻ ഇനി​യും അവസരമുണ്ട്.