അനുഗ്രഹം വാങ്ങി​ സ്ഥാനാർത്ഥി​കൾ

ആലപ്പുഴ : കൊട്ടാരക്കര മഹാഗണപതിയ്ക്ക് മുന്നിൽ ദർശനം നടത്തിയശേഷമായിരുന്നു മാവേലിക്കര മണ്ഡലത്തിലെ യു.ഡി.എഫ് സ്ഥാനാർത്ഥി കൊടിക്കുന്നിൽ സുരേഷിന്റെ റോഡ് ഷോ ഇന്നലെ ആരംഭിച്ചത്. കൊട്ടാരക്കര ഗണപതി ക്ഷേത്രത്തിന് സമീപത്തുനിന്ന് ആരംഭിച്ച റോഡ് ഷോ ഡി.സി.സി പ്രസിഡൻ്റ് പി.രാജേന്ദ്രപ്രസാദ് ഉദ്ഘാടനം ചെയ്തു. ജെബി മേത്തർ എം.പി മുഖ്യപ്രഭാഷണം നടത്തി. കൊട്ടാരക്കരയിലെ ഇലക്ഷൻ വാർ റൂം ഉദ്ഘാടനത്തിനും നഗരത്തിലെ വ്യാപാര സ്ഥാപനങ്ങളുടെ സന്ദർശനത്തിനുംശേഷം ഉമ്മന്നൂർ,വെളിയം, കരീപ്ര,എഴുകോൺ,നെടുവത്തൂർ, കുളക്കട പഞ്ചായത്തുകളിൽ പര്യടനം നടത്തിയ റോഡ് ഷോ രാത്രി മൈലത്ത് സമാപിച്ചു.

പുലർച്ചെ കണിച്ചുകുളങ്ങരയിലെത്തി എസ്.എൻ.ഡി.പിയോഗം ജനറൽ സെക്രട്ടറി വെള്ളാപ്പള്ളി നടേശന്റെ അനുഗ്രഹം വാങ്ങിയശേഷമായിരുന്നു എൻ.ഡി.എ സ്ഥാനാർത്ഥി ബൈജു കലാശാല തിരഞ്ഞെടുപ്പ് പ്രചാരണത്തിന് തുടക്കം കുറിച്ചത്. മുതിർന്ന ബി.ജെ.പി നേതാവ് കുമ്മനം രാജശേഖരൻ തകഴിയിൽ പ്രചാരണ പരിപാടി ഉദ്ഘാടനം ചെയ്തു. കുന്നുമ്മയിൽ ആത്മഹത്യചെയ്ത കർഷക മോർച്ച നേതാവ് കെ.ജി പ്രസാദിന്റെ വീട്ടിലെത്തി അദ്ദേഹത്തിന്റെ സ്മൃതി മണ്ഡപത്തിൽ പുഷ്പാർച്ചന നടത്തി ഭാര്യയെയും മക്കളെയും കണ്ട് വോട്ടഭ്യർത്ഥിച്ച ബൈജു കലാശാല പ്രസാദിന്റെ ഭാര്യ ഓമനയുടെ അനുഗ്രഹം ഏറ്റുവാങ്ങിയാണ് പര്യടനം ആരംഭിച്ചത്. തുടർന്ന് തകഴി ശ്രീധർമ്മശാസ്താ ക്ഷേത്രത്തിൽ ദർശനം നടത്തി നിറപറ സമർപ്പിച്ചു.
തകഴി ശിവശങ്കരപിള്ളയുടെ സ്മൃതി മണ്ഡപത്തിൽ പുഷ്പാർച്ചന നടത്തി. എടത്വാപള്ളി, ചക്കുളത്തുകാവ് ഭഗവതി ക്ഷേത്രം, പരുമലപളളി, പനയന്നാർകാവ് ദേവീക്ഷേത്രം തുടങ്ങിയ ഇടങ്ങളും സന്ദർശിച്ചു.

മണ്ഡലത്തിലുടനീളം ആദ്യറൗണ്ട് പര്യടന പരിപാടി പൂർത്തിയാക്കിയ ഇടതുമുന്നണി സ്ഥാനാർത്ഥി സി.എ അരുൺകുമാർ ഇന്നലെ ചങ്ങനാശേരി എം.എൽ.എ ജോബ് മൈക്കിളിനൊപ്പം മണ്ഡലത്തിലെ പ്രധാന വ്യക്തികളെ നേരിൽ കണ്ട് വോട്ട് അഭ്യർത്ഥിക്കുന്ന തിരക്കിലായിരുന്നു. ഉച്ചയ്ക്ക്ശേഷം കുട്ടനാട് രാമങ്കരിയിലെ ഇടതു കൺവെൻഷനിലും സംബന്ധിച്ചു.

ഇന്നത്തെ പ്രചാരണം

കൊടിക്കുന്നിൽ സുരേഷ്

കൊല്ലം - തിരുപ്പതി ട്രെയിനിന്റെ കന്നിയാത്ര ഫ്ളാഗ് ഓഫ് ചെയ്തശേഷം ട്രെയിനിൽ ചങ്ങാനാശേരിവരെ യാത്ര. അവിടെ നിന്ന് ഉച്ചയ്ക്ക് 2ന് പത്തനാപുരത്തെത്തി റോഡ്ഷോ.പട്ടാഴി വടക്കേക്കര പഞ്ചായത്തിൽ തുടങ്ങി രാത്രി മേലിലയിൽ സമാപനം.

...................................

അഡ്വ. സി.എ അരുൺകുമാർ

രാവിലെ പത്തനാപുരം നിയോജക മണ്ഡലത്തിൽ മുന്നണി നേതാക്കൾക്കൊപ്പം പ്രമുഖ വ്യക്തികളെ സന്ദർശിക്കൽ. വോട്ടഭ്യർത്ഥന. ഉച്ചകഴിഞ്ഞ് കുന്നത്തൂരിൽ തിരഞ്ഞെടുപ്പ് കൺവൻഷൻ.

.............................

ബൈജു കലാശാല

പത്തനാപുരം മണ്ഡലത്തിലാണ് പര്യടനം . 9 ന് പട്ടാഴി ദേവി ക്ഷേത്രത്തിൽ നിന്ന് പര്യടന പരിപാടിയ്ക്ക് തുടക്കം കുറിക്കും.

വൈകിട്ട് കൊട്ടാരക്കരയിൽ റോഡ്ഷോയോടെ സമാപിക്കും.