കോഴിക്കോട്: ഈ മാസം 28,29 തീയതികളിൽ നടക്കുന്ന ദേശീയ പണിമുടക്കിന് മുന്നോടിയായി ജില്ലയിൽ പ്രചാരണ ജാഥ സംഘടിപ്പിക്കുമെന്ന് ട്രേഡ് യൂണിയൻ സർവീസ് സംഘടനാ സംയുക്ത ജില്ലാ സമിതി ഭാരവാഹികൾ അറിയിച്ചു
ബുധനാഴ്ച വൈകീട്ട് 5.30ന് വടകരയിൽ നിന്ന് സംയുക്ത ട്രേഡ് യൂണിയൻ ജില്ലാ പ്രചാരണ ജാഥ ആരംഭിക്കും. സി.ഐ.ടി.യു അഖിലേന്ത്യാ സെക്രട്ടറി കെ.ചന്ദ്രൻ പിള്ള ഉദ്ഘാടനം ചെയ്യും. ഐ.എൻ.ടി.യു.സി നേതാവ് കെ.രാജീവ് ജാഥ നയിക്കും. മാർച്ച് 17ന് രാവിലെ ഒമ്പതിന് ഓർക്കാട്ടേരിയിൽ നിന്നാരംഭിച്ച് വിവിധ സ്വീകരണ കേന്ദ്രങ്ങൾ പിന്നിട്ട് വൈകീട്ട് ആറിന് ബാലുശ്ശേരിയിൽ അവസാനിക്കും. 18ന് രാവിലെ കക്കോടിയിൽ നിന്നാരംഭിച്ച് വൈകീട്ട് 5.30ന് മുതലക്കുളം മൈതാനിയിൽ പൊതുയോഗത്തോടെ ജാഥ സമാപിക്കും.
തൊഴിൽ കോഡുകൾ റദ്ദാക്കുക, അവശ്യ പ്രതിരോധ സേവന നിയമം പിൻവലിക്കുക, സ്വകാര്യവത്കരണവും നാഷണൽ മോണിറ്റൈസേഷൻ പൈപ്പ് ലൈൻ പദ്ധതിയും നിറുത്തിവെക്കുക, കൃഷി, വിദ്യാഭ്യാസം, ആരോഗ്യ പരിരക്ഷ തുടങ്ങി നിർണായക പൊതു സേവനങ്ങൾക്കായി പൊതുനിക്ഷേപം വർധിപ്പിക്കുക, ദേശീയ തൊഴിലുറപ്പു പദ്ധതി തുക വർധിപ്പിക്കുകയും നഗരപ്രദേശങ്ങളിലേക്ക് വ്യാപിപ്പിക്കുകയും ചെയ്യുക, കർഷകപ്രക്ഷോഭത്തിലെ ആവശ്യങ്ങൾ അംഗീകരിക്കുക, പെട്രോളിയം ഉത്പന്നങ്ങൾക്കുള്ള കേന്ദ്ര എക്സൈസ് നികുതി വെട്ടിക്കുറച്ച് വിലക്കയറ്റം തടയുക, ദേശീയ പെൻഷൻ പദ്ധതി പിൻവലിച്ച് എല്ലാ ജീവനക്കാർക്കും പഴയ പെൻഷൻ പദ്ധതി നടപ്പാക്കുക, അസംഘടിത മേഖലാ തൊഴിലാളികൾക്ക് സാമൂഹിക സുരക്ഷാ പദ്ധതി നടപ്പാക്കുക, തൊഴിലാളികൾക്ക് നൽകുന്ന എല്ലാ പരിരക്ഷയും സ്കീം വർക്കർമാർക്കും അനുവദിക്കുക, കരാർ തൊഴിലാളികളെ സ്ഥിരപ്പെടുത്തുക, തുല്യ ജോലിക്ക് തുല്യ വേതനം നൽകുക, കൊവിഡ് മുൻനിര പോരാളികൾക്ക് ആരോഗ്യ ഇൻഷുറൻസ് നടപ്പാക്കുക തുടങ്ങിയ ആവശ്യങ്ങളുന്നയിച്ചാണ് പണിമുടക്ക്.
ട്രേഡ് യൂണിയൻ സർവീസ് സംഘടനാ സംയുക്ത സമിതി ജില്ലാ കൺവീനർ ടി.ദാസൻ, കെ. ഷാജി, എൻ.കെ.സി. ബഷീർ, ഒ.കെ. സത്യൻ, ഷിനു വള്ളിൽ, ഗഫൂർ പുതിയങ്ങാടി, പി.കെ.നാസർ, കെ.കെ.കൃഷ്ണൻ, അഡ്വ. എം.പി.സൂര്യനാരായണൻ, ബഷീർ പാണ്ടികശാല എന്നിവർ വാർത്താസമ്മേളനത്തിൽ പങ്കെടുത്തു.
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |