പൊന്നാനിയിൽ ഹംസയെത്തുക അരിവാൾ ചുറ്റിക നക്ഷത്രത്തിൽ

പൊന്നാനി : പൊന്നാനിയിലെ ഇടതുപക്ഷ സ്വതന്ത്രൻ കെ.എസ്. ഹംസ സി.പി.എം ചിഹ്നത്തിൽ മത്സരിക്കും. ലീഗ് മുൻ സംസ്ഥാന സെക്രട്ടറിയാണ് കെ.എസ്. ഹംസ. യു.ഡി.എഫ് സ്ഥാനാർത്ഥി ആരെന്നു അടുത്ത ദിവസങ്ങളിൽ വ്യക്തമാവും. മലപ്പുറം എം.പി അബ്ദുസമദ് സമദാനിയുടെ പേരാണ് നിലവിൽ പറഞ്ഞുകേൾക്കുന്നത്. ഇ.ടി മുഹമ്മദ് ബഷീർ ഇത്തവണ മലപ്പുറം ലോക്‌സഭ മണ്ഡലത്തിലേക്ക് മാറാനാണ് സാദ്ധ്യത.

പൊന്നാനി ലോക്‌സഭ മണ്ഡലത്തിൽ ഏഴു നിയമസഭ മണ്ഡലങ്ങളാണുള്ളത് . നിലവിൽ ഇവയിൽ നാലിലും ഇടത് എം.എൽ.എമാരാണുള്ളത്. പൊന്നാനി,​തവനൂർ,​ തൃത്താല,​താനൂർ എന്നിവയാണവ. തിരൂരങ്ങാടി,​ കോട്ടയ്ക്കൽ,​ തിരൂർ എന്നിവയിലാണ് യു.ഡി.എഫ് ആധിപത്യം. കഴിഞ്ഞ നിയമസഭ തിരഞ്ഞെടുപ്പിലെ മൊത്തം മണ്ഡലങ്ങളിലെ വോട്ടുനിലയിൽ ഇടതുമുന്നണി മുന്നിലാണ്. ആഞ്ഞു ശ്രമിച്ചാൽ മണ്ഡലം ഇടത്തേക്ക് ചായുമെന്ന പ്രതീക്ഷയിലാണ് ഇടതുപക്ഷം. ഇ.ടി മണ്ഡലത്തിൽ അത്ര സജീവമല്ലെന്ന ആക്ഷേപം തങ്ങൾക്ക് തുണയാകുമെന്നവർ കരുതുന്നു. ബിസിനസുകാരൻ കൂടിയായ ഹംസയ്ക്ക മണ്ഡലത്തിൽ വ്യക്തിബന്ധങ്ങൾ ഏറെയാണ് . സമസ്ത നേതാക്കളുമായി ഹംസയ്ക്ക് അടുത്ത ബന്ധമുണ്ട്. ലീഗുമായി സമസ്ത അത്ര നല്ല ബന്ധത്തിലല്ലെന്നതിനാൽ അവരുടെ വോട്ടുകൾ ആകർഷിക്കാൻ ഹംസയ്ക്കാവുമെന്നാണ് കരുതുന്നത്. മുൻ സംസ്ഥാന ഭാരവാഹിയെന്ന നിലയിൽ ലീഗിലെ വോട്ടുകൾ സമാഹരിക്കാനും ഹംസയ്ക്കാവുമെന്ന് ഇടതുപക്ഷം പറയുന്നു. ഇത്തരത്തിൽ ഹംസ പിടിക്കുന്ന വോട്ടുകൾ ഏറെ നിർണ്ണായകമാവും. 1971ൽ ഇമ്പിച്ചബാവയെ വിജയിപ്പിച്ച പാരമ്പര്യമുള്ള മണ്ഡലത്തിൽ ഇത്തവണ വൻവിജയം നേടാനാവുമെന്ന പ്രതീക്ഷയിലാണ് ഇടതുക്യാമ്പ്.

പാർട്ടി പുറത്താക്കി,​ എതിരാളിയായി മത്സരത്തിന്

• ഗുരുതരമായ അച്ചടക്ക ലംഘനം നടത്തിയെന്ന ലീഗ് സംസ്ഥാന അച്ചടക്ക സമിതിയുടെ വിലയിരുത്തലിനെത്തുടർന്ന് 2023ലാണ് ഹംസയെ പാർട്ടിയിൽ നിന്നും പുറത്താക്കിയത്.
• മുസ്ലിം ലീഗ് സംസ്ഥാന സെക്രട്ടറിയായിരിക്കെ പി.കെ.കുഞ്ഞാലിക്കുട്ടിക്കെതിരെ രൂക്ഷവിമർശനം ഉന്നയിച്ചതിനാണ് കെ.എസ്.ഹംസയ്‌ക്കെതിരെ ആദ്യം നടപടിയുണ്ടായത്. ആദ്യം പാർട്ടി ചുമതലയിൽ നിന്ന് നീക്കി. പിന്നാലെ ഗുരുതര അച്ചടക്ക ലംഘനം ചൂണ്ടിക്കാണിച്ച് പാർട്ടിയിൽ നിന്നും പുറത്താക്കി.
• തൃശൂരിലെ മലബാർ എൻജിനീയറിംഗ് കോളേജിന്റെയും ഇഖ്റാ എഡ്യുക്കേഷണൽ ആൻഡ് ചാരിറ്റബിൾ ട്രസ്റ്റിന്റെയും ചെയർമാനാണ് അദ്ദേഹം.
• ഹംസയുടെ നേതൃത്വത്തിലുള്ള അറഫ ചാരിറ്റബിൾ ട്രസ്റ്റിന് കീഴിൽ ഇംഗ്ലീഷ് മീഡിയം സ്‌കൂളും ബി.എഡ് കോളേജും പ്രവർത്തിക്കുന്നുണ്ട്.