കണ്ണൂർ വിമാനത്താവളത്തിൽ എം.കെ.സ്റ്റാലിന് ഉജ്ജ്വല വരവേൽപ്പ്

മട്ടന്നൂർ: സി.പി.എം.പാർട്ടി കോൺഗ്രസ് സെമിനാറിൽ പങ്കെടുക്കാനെത്തിയ തമിഴ്‌നാട് മുഖ്യമന്ത്രി എം.കെ.സ്റ്റാലിന് കണ്ണൂർ വിമാനത്താവളത്തിൽ ഉജ്ജ്വല സ്വീകരണം. ഇന്നലെ ഉച്ചയ്ക്ക് 12ഓടെയാണ് പ്രത്യേക വിമാനത്തിൽ അദ്ദേഹം കണ്ണൂരിലിറങ്ങിയത്.

മന്ത്രി എം.വി.ഗോവിന്ദൻ,സി.പി.എം. ജില്ലാ സെക്രട്ടറി എം.വി.ജയരാജൻ, ഡോ.വി.ശിവദാസൻ എം.പി. തുടങ്ങിയവർ ചേർന്നാണ് സ്റ്റാലിനെ സ്വീകരിച്ചത്. ഡി.എം.കെ.സംസ്ഥാന സെക്രട്ടറി പുതുക്കോട്ടൈ മുരുകേഷ്, പ്രസിഡന്റ് മൂന്നാർ മോഹൻദാസ് തുടങ്ങിയ ഡി.എം.കെ. നേതാക്കളും വിമാനത്താവളത്തിലെത്തിയിരുന്നു. സി.പി.എം.,ഡി.എം.കെ. പ്രവർത്തകർ മുദ്രാവാക്യം വിളികളോടെയാണ് സ്റ്റാലിനെ വരവേറ്റത്. ഡി.എം.കെ. പതാകയുടെ നിറത്തിലുള്ള ഷാളുകളണിഞ്ഞ നിരവധി പ്രവർത്തകർ വിമാനത്താവളത്തിന് പുറത്ത് കാത്തുനിന്നിരുന്നു.