നെയ് തേങ്ങയെന്ന് കരുതി മൊബൈൽ ഫോൺ ആഴിയിൽ എറിഞ്ഞു, ഫയർഫോഴ്സ് വീണ്ടെടുത്തു

ശബരിമല : നെയ്യ്‌ത്തേങ്ങയെന്ന് കരുതി തീർത്ഥാടകൻ അബദ്ധത്തിൽ ആഴിയിലേക്ക് വലിച്ചെറിഞ്ഞ മൊബൈൽ ഫോൺ അഗ്നിശമനസേനയുടെ സമയോചിത ഇടപെടൽ മൂലം തിരികെ ലഭിച്ചു. ഫോൺ എടുക്കുന്നതിനിടെ അഗ്നിശമനസേന ഉദ്യോഗസ്ഥന് പൊള്ളലേ​റ്റു. കിളിമാനൂർ പള്ളിക്കൽ ആനകുന്നം ചന്ദനഹൗസിൽ അഖിൽരാജിന്റെ മുപ്പതിനായിരം രൂപയോളം വില വരുന്ന മൊബൈൽ ഫോണാണ് ആഴിയിൽ നിന്ന് വീണ്ടെടുത്തത്. ഫയർ ഓഫീസറായ വി.സുരേഷ് കുമാറിനാണ് പൊള്ളലേ​റ്റത്. ഇന്നലെ വൈകിട്ട് ആറുമണിയോടെയായിരുന്നു സംഭവം. അഭിഷേകത്തിന് നെയ്യ് ശേഖരിച്ച ശേഷം ആഴിയിലേക്ക് തേങ്ങ വലിച്ചെറിയുന്നതിനിടെ മൊബൈൽ ഫോണും ആഴിയിൽ വീഴുകയായിരുന്നു. അഗ്നി ശമനസേനയുടെ സന്നിധാനം കൺട്രോൾ റൂമിൽ വിവരം അറിയിച്ചതിനെ തുടർന്ന് അസിസ്​റ്റന്റ് സ്​റ്റേഷൻ ഓഫീസർ കെ.പി.മധുവിന്റെ നേതൃത്വത്തിൽ സീനിയർ ഫയർ റെസ്‌ക്യു ഓഫീസർ ഗണേശൻ, ഫയർ ഓഫീസർമാരായ വി.സുരേഷ് കുമാർ, പി.വി.ഉണ്ണികൃഷ്ണൻ, അരുൺകുമാർ എന്നിവരുടെ സംഘമാണ് ഫോൺ വീണ്ടെടുക്കാൻ നേതൃത്വം നൽകിയത്. നേരിയ പൊള്ളലേ​റ്റ സുരേഷ് കുമാർ സന്നിധാനം ഗവൺമെന്റ് ആശുപത്രിയിൽ ചികിത്സ തേടി.