പൊന്നാട് റോഡിൽ പൊന്ന് പോലെയൊരു ദാഹശമനി

മുഹമ്മ: മേടച്ചൂടിൽ നാട് വെന്തെരിയുന്നു. ദാഹം കൊണ്ട് തൊണ്ട വരളുന്നു. ആപ്പോൾ ഇതാ,​ കാവുങ്കൽ -പൊന്നാട് റോഡിലെ യാത്രക്കാർക്കായി ഒരു കൂജ നിറയെ തണുത്ത വെള്ളം കാത്തിരിക്കുന്നു!

നന്ദനം വീടിന്റെ (കുറുപ്പശ്ശേരി) വീട്ടുപടിക്കലാണ് റോഡിനോട് ചേർന്ന്

യാത്രക്കാർക്കായി ദാഹജലം മൺകൂജയിൽ കരുതിവച്ചിരിക്കുന്നത്.

അതും രാമച്ചത്തിന്റെ സുഗന്ധമുള്ള ശുദ്ധമായ കുടിവെള്ളം. ചോദിക്കാനോ,​ എടുത്തുതരാനോ ആരുമില്ല. സ്റ്റൂളിൽ വച്ചിരിക്കുന്ന

മൺകൂജയിൽ നിന്ന് ദാഹം തീരുവോളം വെള്ളമെടുത്ത് കുടിക്കാം.

ഒമാനിൽ ജോലി ചെയ്യുന്ന ബാബുവിന്റെ ഭാര്യ നിഷയാണ് വഴിയരുകിലെ ഈ ജലസംഭരണി ഒരുക്കിയിരിക്കുന്നത്. പൊന്നാട് റോഡിലൂടെ ഒരു കിലോമീറ്റർ സഞ്ചരിച്ചാൽ ആലപ്പുഴ - തണ്ണീർമുക്കം റോഡിലെ കാവുങ്കൽ എത്താം. യാത്രക്കാരിൽ അധികവും കാൽനടക്കാരാണ്. ദിവസേന നൂറ് കണക്കിന് യാത്രക്കാർ ഇതുവഴി അങ്ങോട്ടും ഇങ്ങോട്ടും സഞ്ചരിക്കുന്നുണ്ട്. എന്നാൽ,​ ഈ റോഡിൽ ഒരു കടപോലുമില്ലെന്നത് വഴിവക്കിലെ ഈ കുടിവെള്ള സംഭരണിയുടെ പ്രസക്തി വർദ്ധിപ്പിക്കുന്നു.

വീട്ടമ്മയുടെ വലിയ മനസ്

വീട്ടമ്മയായ നിഷ രണ്ടാഴ്ച മുമ്പാണ് വഴിവക്കിലെ കുടിവെള്ള സംവിധാനം നടപ്പാക്കിയത്. വീട്ടിൽത്തന്നെ ബ്യൂട്ടി പാർലർ നടത്തുന്ന അവർ,​ എത്ര തിരക്കുണ്ടെങ്കിലും ഇടക്കിടെ വന്ന് കൂജയിൽ വെള്ളം നിറച്ച് വയ്ക്കാറുണ്ട്.

മുഴുവൻ സമയവും വീട്ടിലുണ്ടായിട്ടും,​ എപ്പോഴും വെള്ളം കുടിച്ചിട്ടും ദാഹം ശമിക്കുന്നില്ല. അപ്പോൾ പിന്നെ വെയിലത്ത് സഞ്ചരിക്കുന്നവരുടെ കാര്യം പറയേണ്ടതില്ലല്ലോ. അത് ഓർത്താണ് വീട്ടുപടിക്കൽ ഇത്തരമൊരു സൗകര്യമൊരുക്കിയതെന്ന് നിഷ പറയുന്നു.