വിനായക ചതുർഥി ദിനത്തിൽ ചന്ദ്രനെ കാണരുത്! കണ്ടാൽ ചെയ്യേണ്ടതെന്ത്?​ പിന്നിലെ ഐതിഹ്യം ഇതാണ്

ഗണപതിഭഗവാന്റെ ജന്മദിനമായി വിശ്വസിക്കപ്പെടുന്ന വിനായക ചതുർഥി ഹിന്ദുമതവിശ്വാസത്തിൽ ഏറെ പ്രധാനപ്പെട്ട ദിനമാണ്. ചിങ്ങമാസത്തിലെ വെളുത്തപക്ഷ ചതുർഥിയാണ് വിനായക ചതുർഥിയായി ആചരിക്കുന്നത്. ഇത്തവണ സെപ്തംബർ 14 തിങ്കളാഴ്ചയാണ് വിനായക ചതുർഥി. ഗണപതിയെ പ്രീതിപ്പെടുത്തുന്നതിനായി പൂജ, വ്രതം, ഗണേശ മന്ത്രജപം, ഗണേശ സഹസ്രനാമ പാരായണം തുടങ്ങിയ ആചാരങ്ങൾ ഈ ദിവസം അനുഷ്ഠിക്കാറുണ്ട്.

വിനായക ചതുർഥിയുമായി ബന്ധപ്പെട്ട് ഏറെ ശ്രദ്ധേയമായ ഒരു വിശ്വാസമാണ് അന്നേദിവസം ചന്ദ്രനെ ദർശിക്കരുതെന്നത്. ചന്ദ്രനെ കണ്ടാൽ അപവാദമോ ദുഷ്പേരോ കേൾക്കേണ്ടിവരുമെന്നാണ് വിശ്വാസം. ഇതിന് പിന്നിൽ ഗണപതിയും ചന്ദ്രനും തമ്മിലുള്ള ഒരു ഐതിഹ്യകഥയാണ് പറയപ്പെടുന്നത്.

ഐതിഹ്യമനുസരിച്ച് ഒരിക്കൽ ഗണപതിഭഗവാൻ സദ്യ കഴിച്ച ശേഷം വീട്ടിലേക്ക് മടങ്ങുന്നതിനിടെ വഴിയിൽ വീണു. ഗണപതിയുടെ വലിയ വയറും ശരീരപ്രകൃതിയും കണ്ട് ചന്ദ്രൻ പരിഹസിച്ച് ചിരിച്ചുവെന്നാണ് കഥ. ചന്ദ്രന്റെ പരിഹാസത്തിൽ കോപിച്ച ഗണപതി അന്നേദിവസം ചന്ദ്രനെ ദർശിക്കുന്നവർക്ക് അപവാദവും ദുഷ്പേരും ഉണ്ടാകട്ടെ എന്ന് ശപിച്ചുവെന്നാണ് വിശ്വാസം. ഇതോടെയാണ് വിനായക ചതുർഥി ദിനത്തിൽ ചാന്ദ്രദർശനം ഒഴിവാക്കണമെന്ന ആചാരം രൂപപ്പെട്ടതെന്നാണ് പറയപ്പെടുന്നത്.

ഐതിഹ്യത്തിൽ പിന്നീട് ചന്ദ്രൻ തന്റെ തെറ്റ് മനസിലാക്കി ഗണപതിയോട് ക്ഷമ ചോദിച്ചതായും പറയുന്നു. ഇതോടെ ശാപത്തിന് ഗണപതി ഇളവ് നൽകിയെന്നാണ് വിശ്വാസം. എന്നാൽ വിനായക ചതുർഥി ദിനത്തിൽ ചാന്ദ്രദർശനം നടത്തിയാൽ ഉണ്ടാകുന്ന ദോഷത്തിൽ നിന്ന് മോചനം നേടാൻ ഗണപതിയെ പ്രാർത്ഥിക്കുകയും പ്രത്യേക മന്ത്രം ജപിക്കുകയും ചെയ്യണമെന്നാണ് ചില ആചാരവിശ്വാസങ്ങൾ.അതുകൊണ്ടുതന്നെ വിനായക ചതുർഥി ദിനത്തിൽ ചന്ദ്രനെ അബദ്ധത്തിൽ കാണാതിരിക്കുന്നതിന് വിശ്വാസികൾ പ്രത്യേകം ശ്രദ്ധിക്കാറുണ്ട്.

ഗണപതിയെ പ്രീതിപ്പെടുത്താൻ വ്രതവും പൂജയും

വിനായക ചതുർഥി ദിനത്തിൽ ഗണപതിക്ക് മുക്കുറ്റി, കറുക എന്നിവ ഉപയോഗിച്ച് മാലയും അർച്ചനയും നടത്തുന്നത് വിശേഷമായി കരുതപ്പെടുന്നു. മോദകം, കൊഴുക്കട്ട തുടങ്ങിയ നിവേദ്യങ്ങളും ഗണപതിക്ക് സമർപ്പിക്കാറുണ്ട്. ഗണപതി ഹോമം, ഗണേശ സഹസ്രനാമ പാരായണം, 'ഓം ഗം ഗണപതയേ നമഃ' എന്ന മൂലമന്ത്രജപം എന്നിവയും പലരും ആചരിക്കുന്നു.

ചതുർഥി വ്രതം അനുഷ്ഠിക്കുന്നതും പ്രധാന ആചാരങ്ങളിലൊന്നാണ്. വ്രതത്തിലൂടെ ഗണപതിയുടെ അനുഗ്രഹം ലഭിക്കുകയും ജീവിതത്തിലെ തടസങ്ങൾ നീങ്ങി ഉദ്ദിഷ്ട കാര്യങ്ങൾ സാധ്യമാകുകയും ചെയ്യുമെന്നാണ് വിശ്വാസം.