'മരുമകളായല്ല, മകളായാണ് എന്നെ സ്‌നേഹിച്ചത്'; ഭർതൃമാതാവിന്റെ വിയോഗവാർത്തയിൽ മനംനൊന്ത് നവ്യാനായർ

നടി നവ്യാനായരുടെ ഭർതൃമാതാവ് ശാന്താമേനോൻ അന്തരിച്ചു. വിയോഗവാർത്ത നവ്യാനായർ തന്നെയാണ് സോഷ്യൽമീഡിയ പോസ്റ്റിലൂടെ പങ്കുവച്ചത്. എല്ലാക്കാര്യങ്ങളിലും ധൈര്യം പകർന്ന് കൂടെ നിന്ന വിളക്കണഞ്ഞെന്നും മരുമകളായല്ല മകളായാണ് അമ്മ തന്നെ സ്‌നേഹിച്ചിരുന്നതും നവ്യാനായർ കുറിച്ചു.

'അങ്ങനെ ആ വിളക്ക് അണഞ്ഞു. എന്നും ഏതിനും ധൈര്യമായിരുന്നു , മരുമകളായിട്ടല്ല മകളായി സ്നേഹിച്ചു , എല്ലാ സങ്കടങ്ങളിലും മക്കള് വിഷമിക്കണ്ട അമ്മേടെ പ്രാർഥനയും അനുഗ്രഹവും കൂടെ ഉണ്ടാവും എന്ന് പറഞ്ഞു കൂടെ നിർത്തി. അമ്മ ആഗ്രഹിച്ചത് പോലെ ഇതുവരെ എല്ലാം ചെയ്തു . അമ്മേടെ സ്നേഹത്തിന് മുന്നിൽ എന്റെ നഷ്ടങ്ങൾ ഞാൻ സഹിച്ചു. എന്റെ നൃത്തം ഏറെ ഇഷ്ടപെട്ട അമ്മ, അവസാനമായി മാതംഗി ഫെസ്റ്റിവലിൽ വന്നു എന്റെ കച്ചേരി മുഴുവൻ കണ്ടു. രണ്ട് മണിക്കൂർ നൃത്തം ചെയ്തു എന്ന് അഭിമാനത്തോടെ എല്ലാരോടും പറഞ്ഞു'- നവ്യ കുറിച്ചു.

മക്കളേ എന്ന വിളി കാതുകളിൽ മുഴങ്ങിനിൽക്കുമെന്നും നവ്യ കൂട്ടിച്ചേർത്തു. ഒന്നിച്ചുണ്ടായിരുന്ന സമയത്തെ നല്ല ഓർമ്മകളുടെ ചിത്രങ്ങളും കുറിപ്പിനൊപ്പം താരം പങ്കുവച്ചിട്ടുണ്ട്. നവ്യാനായരുടെ ഭർത്താവ് സന്തോഷ് മേനോനും അമ്മയുടെ വിയോഗവാർത്ത പങ്കുവച്ചിരുന്നു.