
തിരുവനന്തപുരം: കേരളത്തിലെത്തിയ കേന്ദ്ര ആഭ്യന്തര മന്ത്രി അമിത് ഷായെ യൂത്ത് കോൺഗ്രസ് പ്രവർത്തകർ കരിങ്കൊടി കാണിച്ചതിനു പിന്നാലെയുണ്ടായ സംഘർഷം കൈവിട്ടതോടെ തലസ്ഥാനം ഇന്നലെ സന്ധ്യയോടെ യുദ്ധക്കളമായി. സംസ്ഥാനത്തെങ്ങും യു.ഡി.എഫ് മന്ത്രിമാരെ യുവമോർച്ച പ്രവർത്തകർ കരിങ്കൊടി കാണിക്കുന്നതിനെ ചൊല്ലിയുണ്ടായ ഏറ്റുമുട്ടൽ പിന്നീട് യൂത്ത് കോൺഗ്രസ്-എസ്.എഫ്.ഐ സംഘർഷമായി പരിണമിച്ചു.
മന്ത്രിമാരെയും നേതാക്കളെയും പരസ്പരം വഴിയിൽതടഞ്ഞ് തുടങ്ങിയ പ്രതിഷേധം രാത്രിയോടെയാണ് തലസ്ഥാന നഗരത്തെ കലുഷിതമാക്കിയത്. പി.കെ. കൃഷ്ണദാസിനെ യൂത്ത് കോൺഗ്രസ് പ്രവർത്തകരും തുടർന്ന് മന്ത്രി കെ.എം. ഷാജിയെ യുവമോർച്ച പ്രവർത്തകരും തടഞ്ഞു. ഇതിനു പിന്നാലെയാണ് യൂത്ത് കോൺഗ്രസ്-എസ്.എഫ്.ഐ സംഘർഷവുമുണ്ടായത്.യൂണിവേഴ്സിറ്റി മെൻസ് ഹോസ്റ്റലിനുള്ളിൽ കയറി പൊലീസ് ലാത്തിച്ചാർജ്ജ് നടത്തിയത് സ്ഥിതി രൂക്ഷമാക്കി. ലാത്തിച്ചാർജ്ജിൽ നിരവധി വിദ്യാർത്ഥികൾക്ക് പരിക്കേറ്റു. രണ്ട് വിദ്യാർത്ഥികളുടെ തലയ്ക്കാണ് പരിക്ക്. ലാത്തിയടിയിൽ പലരുടെയും കൈയ്ക്കും കാലിനും പരിക്കുണ്ട്. മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാർ രാജിവയ്ക്കണമെന്നാവശ്യപ്പെട്ട് യൂത്ത് കോൺഗ്രസ് നേതൃത്വത്തിൽ പാളയം യൂണിവേഴ്സിറ്റി ഹോസ്റ്റലിന് സമീപത്തുനിന് ആരംഭിച്ച ഏജീസ് ഓഫീസ് മാർച്ചിന്റെ തുടക്കത്തിലുണ്ടായ നേരിയ സംഘർഷമാണ് പിന്നീട് രൂക്ഷമായത്. രാത്രി 8 ഓടെയാണ് യൂത്ത് കോൺഗ്രസ് പ്രവർത്തകർ പാളയത്ത് എത്തിയത്. പന്തം കൊളുത്തി പ്രകടനത്തിനു അവർ തയ്യാറെടുക്കുന്നതിനിടെ മെൻസ് ഹോസ്റ്റലിൽ നിന്ന് കല്ലേറ് ഉണ്ടായി. യൂത്ത് കോൺഗ്രസ് തിരിച്ചും കല്ലേറ് നടത്തി. ഇതിനിടയിൽ ചില പ്രവർത്തകർ കത്തിച്ച പന്തം ഹോസ്റ്റൽ പരിസരത്തേക്ക് വലിച്ചെറിഞ്ഞു. നേതാക്കൾ ഇടപെട്ട് ശാന്തമാക്കിയതിനു പിന്നാലെ യൂത്ത് കോൺഗ്രസ് പ്രവർത്തകർ പ്രകടനമായി സെക്രട്ടേറിയറ്റിന് മുന്നിലേക്ക് പോയി. തിരികെ എത്തിയ പ്രവർത്തകർ മെൻസ് ഹോസ്റ്റലിലേക്ക് പ്രകടനം നടത്തിയതോടെ വീണ്ടും സംഘർഷമായി. ഹോസ്റ്റലിന് അകത്തേക്ക് യൂത്ത് കോൺഗ്രസ് പ്രവർത്തകരും തിരികെ എസ്.എഫ്.ഐ പ്രവർത്തകരും കല്ലേറ് നടത്തി. മെൻസ് ഹോസ്റ്റലിന് മൂന്നിൽ ഉണ്ടായിരുന്ന പൊലീസിനെ മറികടന്ന് യൂത്ത് കോൺഗ്രസ് പ്രവർത്തകർ അകത്ത് കടക്കാൻ ശ്രമിച്ചു. ഇത് തടയാൻ സാധിക്കാതെ വന്നതോടെ പൊലീസ് കണ്ണീർവാതകം പ്രയോഗിച്ചു. ഒട്ടേറെ തവണ കണ്ണീർവാതകം പ്രയോഗിച്ചിട്ടും പ്രവർത്തകർ പിരിഞ്ഞു പോയില്ല. ഇതിനിടയിൽ മെൻസ് ഹോസ്റ്റലിലേക്ക് പൊലീസ് കടക്കാൻ ശ്രമിച്ചതോടെ എസ്.എഫ്.ഐ സംസ്ഥാന സെക്രട്ടറി പി.എസ്.സഞ്ജീവിന്റെ നേതൃത്വത്തിൽ പ്രതിഷേധിച്ചു. പിന്നാലെ പൊലീസ് ലാത്തി ചാർജ്ജ് നടത്തി. ഇതിലാണ് വിദ്യാർത്ഥികൾക്ക് പരിക്കേറ്റത്. സംഘർഷത്തിനു പിന്നാലെ എ.ഡി.ജി.പി പി.വിജയൻ, കമ്മിഷണർ അരുൾ ആർ.ബി. കൃഷ്ണ എന്നിവർ സ്ഥലത്ത് എത്തി. പ്രതിപക്ഷ നേതാവ് പിണറായി വിജയനടക്കം പാളയം ഹോസ്റ്റലിന് മുന്നിലെത്തി. എസ്.എഫ്.ഐ ഇന്ന് സംസ്ഥാന വ്യാപകമായി പഠിപ്പുമുടക്കും.
യുവമോർച്ച തടഞ്ഞു, മന്ത്രി ഷാജി നടന്നുപോയി
തിരുവനന്തപുരം: ഇന്നലെ സെക്രട്ടേറിയറ്റിൽ നിന്നിറങ്ങിയ തദ്ദേശ മന്ത്രി കെ.എം.ഷാജിയെ വൈകിട്ട് 7.15 ഓടെ വാൻറോസ് ജംഗ്ഷനിലാണ് യുവമോർച്ച പ്രവർത്തകർ തടഞ്ഞത്. ഇതോടെ വാഹനത്തിൽ നിന്നിറങ്ങിയ മന്ത്രി ഓട്ടോയിൽ കയറി. അതും തടഞ്ഞതോടെ മന്ത്രി പുറത്തിറങ്ങി നടന്നുനീങ്ങി. ഇതോടെ പ്രതിഷേധക്കാർ പിൻമാറി. ഒന്നരകിലോമീറ്റർ നടന്ന് എട്ടുമണിയോടെയാണ് മന്ത്രി നന്ദാവനത്തെ ഓദ്യോഗിക വസതിയായ പൗർണ്ണമിയിലെത്തിയത്. ജില്ലയിലെമ്പാടും ബി.ജെ.പി കോൺഗ്രസ് പ്രവർത്തകർ തമ്മിൽ സംഘർഷം കടുക്കുകയാണ്. മന്ത്രി ഷാജിക്ക് പൈലറ്റും എസ്കോർട്ടും ഉണ്ടായിരുന്നില്ല. ഇത് ഗുരുതര സുരക്ഷാവീഴ്ചയാണെന്നാണ് വിലയിരുത്തൽ.
കൃഷ്ണദാസിനു നേരെ ആക്രമണം
ബി.ജെപി യുടെ സൗത്ത് ജില്ല പ്രസിഡന്റ് മുക്കംപാലമൂട് ബിജുവിനെ കോൺഗ്രസുകാർ കൈയേറ്റം ചെയ്തുവെന്നാരോപിച്ച് ഇന്നലെ രാവിലെ മുതൽ ജില്ലയിൽ പലയിടത്തും കോൺഗ്രസ്- ബി.ജെ.പി പ്രവർത്തകർ ഏറ്റുമുട്ടിയിരുന്നു. ഇതിനിടയിൽ ഡി.സി.സി ഓഫീസിന് നേരെ ബി.ജെ.പിക്കാരെന്ന് സംശയിക്കുന്നവർ ആക്രമണം നടത്തി.
പിന്നാലെ നെയ്യാറ്റിൻകരയിൽ ബി.ജെ.പി നേതാവ് പി.കെ.കൃഷ്ണദാസിനു നേരെ കോൺഗ്രസ് പ്രവർത്തകർ ആക്രമണം നടത്തി.
|
അപ്ഡേറ്റായിരിക്കാം ദിവസവും
ഒരു ദിവസത്തെ പ്രധാന സംഭവങ്ങൾ നിങ്ങളുടെ ഇൻബോക്സിൽ |