സുരാജ് സി.പി വിജിലൻസ് ട്രൈബ്യൂണലാവും

തിരുവനന്തപുരം: കോഴിക്കോട് വിജിലൻസ് ട്രൈബ്യൂണലായി സുരാജ് സി.പിയെ നിയമിക്കാൻ മന്ത്രിസഭായോഗം തീരുമാനിച്ചു.

സംസ്ഥാന വിമുക്തഭട വികസന പുനരധിവാസ കോർപ്പറേഷൻ (കെക്‌സ്‌കോൺ) മാനേജിംഗ് ഡയറക്ടറായി കേണൽ സെബാസ്റ്റ്യൻ ഫ്രാൻസിസിനെ 5 വർഷത്തേക്ക് കരാർ അടിസ്ഥാനത്തിൽ നിയമിച്ചു.

അനീഷ്‌കുമാർ പി.വി,വർഗീസ് എ.എഫ്,പ്രകാശൻ പി.ടി എന്നീ റിട്ട. ജില്ലാ സെഷൻസ് ജഡ്ജിമാരെ യഥാക്രമം ആറ്റിങ്ങൽ,ഒറ്റപ്പാലം,കോഴിക്കോട് എന്നീ കുടംബകോടതികളിൽ നിയമിക്കാൻ അനുമതി നൽകി.

കേരള അഡ്മിനിസ്‌ട്രേറ്റീവ് ട്രൈബ്യൂണിലെ ഗവ. പ്ലീഡർമാരായ ശങ്കർലാൽ ബി.എസ്,രഞ്ജിത്ത് .എ എന്നിവരെ ഡിസംബർ 24 മുതൽ മുൻകാല പ്രാബല്യത്തോടെ മൂന്ന് വർഷത്തേക്ക് പുനർനിയമിച്ചു.

വെജിറ്റബിൾ ആൻഡ് ഫ്രൂട്ട്സ് പ്രമോഷൻ കൗൺസിലിന്റെ ചീഫ് എക്‌സിക്യൂട്ടീവ് ഓഫീസറായി വി. ശിവരാമകൃഷ്ണന് ഒരു വർഷത്തേക്ക് പുനർ നിയമനം നീട്ടിനൽകും.

 തീരദേശ വികസന കോർപ്പറേഷൻ മാനേജിംഗ് ഡയറക്ടർ പി.ഐ ഷേയ്ക്ക് പരീതിന്റെ പുനർനിയമന കാലാവധി ഒരു വർഷത്തേക്ക് നീട്ടി.

ബഞ്ച്മാർക്ക് ഭിന്നശേഷിയുള്ളവർക്കും വിമുക്തഭടന്മാർക്കും ബാർ അംഗങ്ങളിൽ നിന്നും നേരിട്ടുള്ള റിക്രൂട്ട്‌മെന്റ് മുഖേനയുള്ള ജില്ലാ സെഷൻസ് ജഡ്ജ് നിയമനത്തിൽ ഉയർന്ന പ്രായപരിധിയിൽ 5 വർഷത്തെ ഇളവ് നൽകുന്നതിന് മന്ത്രിസഭായോഗം തീരുമാനിച്ചു.