വയോജനം

തലയിലും താടിയിലും
മൂക്കിലും മൂക്കിനു കീഴിലും
മുടികളുണ്ടെങ്കിൽ
സ്വയമേവ നിറം മാറ്റം—
കറുപ്പ് ചെമ്പിക്കുന്നു, വെളുക്കുന്നു.

ഇളമുറച്ചങ്ങാതിതൻ ചോദ്യം—
'വയസ്സെത്രയായി?'

നര ബാധിച്ചൊരുത്തരം—
'പലപ്പോഴായിട്ടറുപതു കടന്നെടോ,
ആറു പതിറ്റാണ്ടിൻ ചെറുപ്പമാകുന്നു
ബാക്കിപത്രം;
ജര ബാധയില്ലെന്നൊരാശ്വാസവും.'

കനംതൂങ്ങിയ വെയിലേറ്റ്
കവിൾത്തടങ്ങളിൽ കറുത്തപാടുകൾ.
മന്ദം മന്ദം ചുവടുകൾ,
മാറുന്ന ശീലങ്ങളും,
പുത്തൻ നിശ്ശബ്ദത—
ഒക്കെയും ചില സൂചകങ്ങൾ.

എങ്കിലും തേരോട്ടമാകുന്ന അനുഭവങ്ങൾ
അർഥപൂർണ്ണമാക്കുന്നു സഹജീവനം.

ജീവിതകഥ തീരുന്നില്ലിവിടെ;
തുടങ്ങുന്നതോ അറിവിൻ
പുത്തനധ്യായമർത്ഥങ്ങൾ,
സ്‌നേഹമൂല്യങ്ങളുപദേശങ്ങൾ.

വിവേചനങ്ങളൊത്തിരി
നേരിടുന്നുണ്ടിവർ വയോജനങ്ങൾ;
വിവേചനങ്ങളൊക്കെയും
അവകാശധ്വംസനങ്ങൾ.