കൊച്ചി: ഇന്ത്യയിലെ മുൻനിര എസ്‌. യു. വി നിർമ്മാതാക്കളായ മഹീന്ദ്ര ആൻഡ് മഹീന്ദ്ര ലിമിറ്റഡ് രണ്ട് വേരിയന്റുകളിൽ ബൊലേറോ നിയോ+ പുറത്തിറക്കി. ഡ്രൈവർ ഉൾപ്പെടെ 9 യാത്രക്കാരെ സുഖകരമായി ഉൾക്കൊള്ളുന്ന പുതിയ മോഡൽ പി4, പി10 വകഭേദങ്ങളിലാണ് വിപണിയിലെത്തുക. എൻട്രി ലെവൽ മോഡലാണ് പി4, പ്രീമിയം വേരിയന്റാണ് പി10. ബൊലേറോയുടെ മികവിനൊപ്പം നിയോയുടെ സ്‌റ്റൈലിഷ് ബോൾഡ് ഡിസൈനും പ്രീമിയം ഇന്റീരിയറുകളും സാങ്കേതികവിദ്യയും സംയോജിപ്പിച്ചാണ് ബൊലേറോ നിയോ+ എത്തുന്നത്. 11.39 ലക്ഷം രൂപയാണ് എക്‌സ്‌ഷോറൂം പ്രാരംഭ വില.

വലിയ കുടുംബങ്ങൾ, ഇൻസ്റ്റിറ്റിയൂഷണൽ ഉപഭോക്താക്കൾ, ടൂർട്രാവൽ ഓപ്പറേറ്റർമാർ, കമ്പനികൾക്ക് വേണ്ടി വാഹനങ്ങൾ പാട്ടത്തിനെടുക്കുന്ന കരാറുകാർ എന്നിവർക്കുള്ള അനുയോജ്യമായ ഓപ്ഷനായിരിക്കും ഈ മോഡൽ. റിയർവീൽഡ്രൈവ് കോൺഫിഗറേഷനിൽ 6 സ്പീഡ് ഗിയർബോക്‌സിനൊപ്പം പ്രശസ്തമായ 2.2 ലിറ്റർ എംഹോക്ക് ഡീസൽ എഞ്ചിൻ ബൊലേറോ നിയോ+ൽ സജ്ജീകരിച്ചിട്ടുണ്ട്. പ്രീമിയം ഇറ്റാലിയൻ ഇന്റീരിയറുകളാണ് മറ്റൊരു സവിശേഷത. ബ്ലൂടൂത്ത്, യുഎസ്ബി ആൻഡ് ഓക്‌സ് കണ്ര്രകിവിറ്റിയുള്ള 22.8 സെന്റീമീറ്റർ ടച്ച് സ്‌ക്രീൻ ഇൻഫോടെയ്ൻമെന്റ് സിസ്റ്റത്തോടുകൂടിയ പ്രീമിയം ഫാബ്രിക്കും വാഹനത്തിന്റെ ഭംഗി കൂട്ടുന്നു. ഇന്ധനക്ഷമത വർധിപ്പിക്കുന്നതിന് മൈക്രോഹൈബ്രിഡ് സാങ്കേതികവിദ്യയും ബൊലേറോ നിയോ+ലുണ്ട്. ബൊലേറോ നിയോ+ പി4 വേരിയന്റിന് 11.39 ലക്ഷം രൂപയും, ബൊലേറോ നിയോ+ പി10 വേരിയന്റിന് 12.49 ലക്ഷം രൂപയുമാണ് എക്‌സ്‌ഷോറൂം വില.

തുടർച്ചയായി പ്രതീക്ഷകൾക്കപ്പുറമുള്ള പ്രകടനം നൽകി, ബൊലേറോ ബ്രാൻഡ് വർഷങ്ങളായി ഞങ്ങളുടെ ഉപഭോക്താക്കൾക്ക് ദൃഢതയുടെയും വിശ്വാസ്യതയുടെയും മുഖമുദ്രയായി മാറിയിരിക്കുന്നുവെന്ന് മഹീന്ദ്ര ആൻഡ് മഹീന്ദ്ര ലിമിറ്റഡ് ഓട്ടോമോട്ടീവ് സെക്ടർ സിഇഒ നളിനികാന്ത് ഗൊല്ലഗുണ്ട പറഞ്ഞു.