വിഴിഞ്ഞത്തെ സംരക്ഷിക്കണം,​ വളരാൻ അനുവദിക്കണം

പൊതുതാത്പര്യത്തെ നിക്ഷേപത്തിന്റെ പേരിൽ ദുർബലമാക്കരുത്. കരാറിന്റെ ന്യായവും ഉദ്ദേശ്യപരവും യുക്തിസഹവുമായ വ്യാഖ്യാനത്തിലാണ് കാര്യം. വിഴിഞ്ഞം സംരക്ഷണവും വളർച്ചയും അർഹിക്കുന്നു.

വിഴിഞ്ഞം സാധാരണ തുറമുഖ പദ്ധതിയല്ല. കേരളത്തിന്റെ ഏറ്റവും പ്രധാനപ്പെട്ട അടിസ്ഥാന സൗകര്യ ആസ്തികളിൽ ഒന്നാണ്. സമുദ്ര, ലോജിസ്റ്റിക്സ് ഭൂപടത്തിൽ മാറ്റംവരുത്താൻ കഴിവുള്ള ആഴക്കടൽ അന്താരാഷ്ട്ര ട്രാൻസ്ഷിപ്പ്മെന്റ് തുറമുഖം. കേരള സർക്കാരും അദാനി വിഴിഞ്ഞം പോർട്ട് പ്രൈവറ്റ് ലിമിറ്റഡും തമ്മിലുണ്ടാക്കിയ കരാറിലൂടെ യാഥാർത്ഥ്യമായ പൊതു-സ്വകാര്യ പദ്ധതി. ഈ തുറമുഖം കരാർ ചട്ടക്കൂടിനുള്ളിൽ വികസിപ്പിക്കുകയും പ്രവർത്തിപ്പിക്കുകയും ചെയ്യുന്ന പൊതു അടിസ്ഥാനസൗകര്യ പദ്ധതിയാണ്.

അദാനി ഗ്രൂപ്പിന് അവകാശങ്ങളുണ്ട്. പക്ഷേ, അതു വ്യവസ്ഥകൾക്ക് വിധേയമാണ്. സർക്കാരിന് മേൽനോട്ടത്തിന്റെ ഉത്തരവാദിത്വവുമുണ്ട്. എന്നാലത് കരാറിന്റെ നാല് കോണുകൾക്കുള്ളിൽ നിന്നുകൊണ്ട് നടപ്പാക്കണം. ടെർമിനൽ ഇൻവെസ്റ്റ്‌മെന്റ് ലിമിറ്റഡ് അഥവാ ടി.ഐ.എൽ സംബന്ധിച്ചാണ് ഇപ്പോൾ ചർച്ച. മുൻകൂർ അംഗീകാരത്തിൽ കരാറിലെ വ്യവസ്ഥകൾ വ്യക്തമാണ്. അതോറിട്ടിയുടെ മുൻകൂർ അനുമതിയില്ലാതെ കരാറിൽ മാറ്റം അനുവദനീയമല്ല.

നേരിട്ടോ അല്ലാതെയോ 25ശതമാനം അല്ലെങ്കിൽ അതിൽ കൂടുതൽ ഓഹരികൾ ഏറ്റെടുക്കുന്നതിനും,​ ഡയറക്‌ടർ ബോർഡിന്മേലുള്ള നിയന്ത്രണം ഏറ്റെടുക്കുന്നതിനും മുൻകൂർ അനുമതി ആവശ്യമാണെന്ന് ക്ലോസ് 5.3.2 വ്യവസ്ഥ ചെയ്യുന്നു. ദേശീയ സുരക്ഷ, പൊതുതാത്പര്യം എന്നിവയുടെ കോണിൽകൂടി ഇക്കാര്യം കാണണം. മുൻകൂർ അംഗീകാരമില്ലാതെ നിർദ്ദിഷ്ട 49ശതമാനം നിക്ഷേപം പ്രാബല്യത്തിൽ വരുത്താൻ കഴിയില്ല. ഇടപാട് പരിശോധിക്കാൻ സർക്കാരിന് പൂർണമായും അവകാശമുണ്ട്.

ഓഹരി ഉടമകളുടെ ഘടന, ഗുണഭോക്തൃ ഉടമസ്ഥാവകാശ വിശദാംശങ്ങൾ, ഓഹരി ഉടമകളുടെ കരാർ, ബോർഡ് അവകാശങ്ങൾ, വീറ്റോ അവകാശങ്ങൾ, പ്രവർത്തന അവകാശങ്ങൾ, ഗതാഗത ക്രമീകരണങ്ങൾ, ദേശീയ സുരക്ഷ, പൊതുതാത്‌പര്യം, മത്സര ആശങ്കകൾ എന്നിവ ബോദ്ധ്യപ്പെടാൻ ആവശ്യമായ എല്ലാ രേഖകളും സർക്കാരിന് ആവശ്യപ്പെടാം. ക്ലോസ് 5.9, 250 കിലോമീറ്റർ ചുറ്റളവിലുള്ള മത്സര തുറമുഖങ്ങളിൽ നിയന്ത്രണത്തിന്റെയോ പ്രവർത്തനപരമായ സ്വാധീനത്തിന്റെയോ കേന്ദ്രീകരണം തടയുകയെന്ന ലക്ഷ്യമിട്ടുള്ളതാണ്.

വിഴിഞ്ഞത്തേക്ക് മൂലധനം, ഗതാഗതം, സാങ്കേതികവിദ്യ, ആഗോള കണക്ടിവിറ്റി എന്നിവ കൊണ്ടുവന്നേയ്ക്കാവുന്ന ഒരു ഇടപാടിനെ അടിച്ചമർത്താൻ ഈ വ്യവസ്ഥ ഉപയോഗിക്കരുത്. തുറമുഖം അതോറിട്ടിയുടെ ഉടമസ്ഥതയിലും ഭരണത്തിലും ആയിരിക്കാം. അതേസമയം സ്വകാര്യ ഓപ്പറേറ്റർക്ക് ആ തുറമുഖത്തിനുള്ളിൽ ടെർമിനൽ പ്രവർത്തിപ്പിക്കാം.

വിഴിഞ്ഞത്തിന്റെ 250 കിലോമീറ്ററിനുള്ളിൽ മറ്റൊരു മത്സര തുറമുഖത്തെ നിയന്ത്രിക്കുകയോ പ്രവർത്തിപ്പിക്കുകയോ ചെയ്യുന്നുണ്ടോ, അതിന്റെ നിർദ്ദിഷ്ട നിക്ഷേപം വിഴിഞ്ഞത്തിന്റെ പ്രവർത്തനങ്ങളിലോ സേവനങ്ങളിലോ 25ശതമാനത്തിൽ കൂടുതൽ നിയന്ത്രണം കൊണ്ടുവരുമോ?. ഉത്തരം അതേ എന്നാണെങ്കിൽ ക്ലോസ് 5.9 ശക്തമായി പ്രയോഗിക്കണം. ഉത്തരം ഇല്ല എന്നാണെങ്കിൽ, ടി.ഐ.എൽ വിശാലമായ ആഗോള ഷിപ്പിംഗ് ഗ്രൂപ്പിൽപ്പെട്ടതാണ് എന്നതുകൊണ്ട് മാത്രം തന്ത്രപരമായ നിക്ഷേപത്തെ തടസപ്പെടുത്താൻ ആ ക്ലോസ് വലിച്ചുനീട്ടരുത്.

ഭയത്തിന്റെ ലെൻസിലൂടെ

വീക്ഷിക്കരുത്

കേരളം വിഴിഞ്ഞത്തെ സംരക്ഷിക്കേണ്ടതുണ്ട്. വിഴിഞ്ഞത്തെ വളരാൻ അനുവദിക്കുകയും വേണം. ലോകോത്തര ട്രാൻസ്ഷിപ്പ്മെന്റ് തുറമുഖം നിർമ്മിക്കാൻ മൂലധനം, ഷിപ്പിംഗ്-ലൈൻ ആത്മവിശ്വാസം, ടെർമിനൽ വൈദഗ്ദ്ധ്യം, കാർഗോ പ്രതിബദ്ധത, ആഗോള നെറ്റ്‌വർക്ക് ആക്‌സസ്, ദീർഘകാല വാണിജ്യ പങ്കാളിത്തം എന്നിവ ആവശ്യമാണ്. ഓരോ തന്ത്രപരമായ നിക്ഷേപത്തെയും ഭയത്തിന്റെ ലെൻസിലൂടെ മാത്രം വീക്ഷിച്ചാൽ വികസനത്തെ ബാധിക്കും.

കൺസഷൻ കരാറിന്റെ ഉദ്ദേശ്യം കേവലം നിയന്ത്രണം മാത്രമല്ല. അത് പ്രാപ്തമാക്കുക കൂടിയാണ്. പൊതുതാത്പര്യം, ദേശീയസുരക്ഷ, മത്സരം, സുതാര്യത എന്നിവയുമായി പൊരുത്തപ്പെടുന്ന രീതിയിൽ വികസനം നടക്കുന്നുണ്ടെന്ന് ഉറപ്പാക്കാൻ നിയന്ത്രണങ്ങൾ നിലവിലുണ്ട്.

ഇളവുകളെ, വികസനത്തെ തന്നെ പരാജയപ്പെടുത്തുന്ന തരത്തിൽ സങ്കുചിതമായോ യാന്ത്രികമായോ വ്യാഖ്യാനിക്കരുത്. അതിനാൽ ശരിയായ സമീപനം അന്ധമായ അംഗീകാരമോ പ്രതിഫലനപരമായ നിരസിക്കലോ അല്ല.

മുൻകൂർ അനുമതി അനിവാര്യമാണെന്ന് സർക്കാർ നിലപാടെടുക്കണം. ഇടപാട് കർശനമായി പരിശോധിക്കണം. മത്സരം, ദേശീയസുരക്ഷ, പൊതുതാത്പര്യം എന്നിവയിൽ വിട്ടുവീഴ്ച ചെയ്യുന്നില്ലെന്ന് ഉറപ്പാക്കണം. അതേസമയം, വികസനം തടസപ്പെടുത്തരുത്.

പൊതുതാത്പര്യത്തെ നിക്ഷേപത്തിന്റെ പേരിൽ ദുർബലമാക്കരുത്. കരാറിന്റെ ന്യായവും ഉദ്ദേശ്യപരവും യുക്തിസഹവുമായ വ്യാഖ്യാനത്തിലാണ് കാര്യം. വിഴിഞ്ഞം സംരക്ഷണവും വളർച്ചയും അർഹിക്കുന്നു. രണ്ടും നേടുന്നതിന് കരാർ കൃത്യമായ രീതിയിൽ വിലയിരുത്തേണ്ടതുണ്ട്.