നഗരപിതാവിന്റെ വീട്ടിലേക്ക് ലോറി മറിഞ്ഞു, അപകടം ഒഴിവായി  

ഫറോക്ക്: ഫറോക്കിൽ റോഡരിക് ഇടിഞ്ഞതിനെ തുടർന്ന് പാർക്ക് ചെയ്തിരുന്ന ലോറി തലകീഴായി വീടിന് മുകളിലേക്ക് ​മറിഞ്ഞ് അപകടം. സിമന്റ് കയറ്റിയ തായ്ഗ്രൂപ്പിന്റെ ടോറസ് ലോറിയാണ് ഫറോക്ക് നഗരസഭാ ചെയർമാൻ എൻ സി അബ്ദുൾറസാഖിന്റെ വീടിന് മുകളിലേക്ക് മറിഞ്ഞത്. വീടിന്റെ ഒരു ഭാഗം പൂർണമായി തകർന്ന അവസ്ഥയിലാണ്. മുറ്റത്തുണ്ടായിരുന്ന ബൈക്കും ലോറിക്കടിയിൽ പെട്ടു. ഈ ഭാഗത്ത് ആളില്ലാതിരുന്നത് കൊണ്ട് വലിയ അപകടമാണ് ഒഴിവായത്. ബി.എസ്.എൻ.എല്ലിന്റെ ഒരു ടെലഫോൺ പോസ്റ്റും തകർന്നു .ലോറി ഡ്രൈവർ പാലക്കാട് കിഴക്കുപുറം വടക്കുമ്പാടം വീട്ടിൽ ഷിബി (29)ക്ക് പരിക്കേറ്റിട്ടുണ്ട്. ഫറോക്ക് നഗരസഭാ ഓഫീസിന് സമീപം ഇന്നലെ രാവിലെ 9 നാണ് അപകടമുണ്ടായത്. അനധികൃതമായി വാഹനം പാർക്ക് ചെയ്തതാണ് അപകടത്തിന് കാരണമെന്നാണ് പ്രദേശവാസികൾ പറഞ്ഞു. വൈകീട്ട് മൂന്നോടെ ലോറി ഉയർത്തി. ലോറിയിലെ ഓയിൽ റോഡിൽ പരന്നൊഴുകിയത് വാഹനങ്ങൾക്കും നാട്ടുകാർക്കും ദുരിതമായി. മീഞ്ചന്തയിൽ നിന്നെത്തിയ ഫയർ ഫോഴ്സ് യൂണിറ്റാണ് റോഡിലെ ഓയിൽ കഴുകി വൃത്തിയാക്കിയത്.