വിജയിച്ചത് പ്രോസിക്യൂഷന്റെ പഴുതടച്ച വാദം,​ തെളിവുകൾ

തിരുവനന്തപുരം: ഷാരോൺ വധക്കേസിൽ ഡിജിറ്റൽ തെളിവുകൾ ഉൾപ്പെടെ ശേഖരിച്ച് പ്രതിഭാഗത്തിന്റെ വാദമുഖങ്ങൾ ഒന്നൊന്നായി ഖണ്ഡിക്കാൻ പ്രോസിക്യൂഷനായി. 95 സാക്ഷികളെ കോടതിയിൽ ഹാജരാക്കി. ഒപ്പം 323 രേഖകളും 53 തൊണ്ടി മുതലുകളും.

ഷാരോണിന്റെ സഹോദരൻ ഷൈമൻ, മാതാപിതാക്കൾ,​ അയൽവാസികൾ എന്നിവർ പ്രോസിക്യൂഷന് അനുകൂലമായി മൊഴി നൽകി. തിരുവനന്തപുരം മെഡിക്കൽ കോളേജ് ആശുപത്രിയിലെ മെഡിസിൻ, ഇ.എൻ.ടി, റെസ്പിറേറ്ററി, എമർജൻസി ഐ.സി.യു, വൃക്കരോഗ വിഭാഗം മേധാവികളും, ടോക്സികോളജി വിദഗ്ദ്ധൻ വി.വി.പിള്ളയും പാരക്വറ്റ് എന്ന കളനാശിനിയാണ് മരണകാരണമെന്ന് കോടതിയിൽ തെളിവ് നൽകി. ഷാരോണിനെ പോസ്റ്റ്‌മോർട്ടം നടത്തിയ ഫോറൻസിക് മെഡിസിൻ വിദഗ്ദ്ധയും, ഹിസ്റ്റോപത്തോളജിസ്റ്റും മരണകാരണം പാരക്വറ്റ് തന്നയെന്ന് കോടതിയെ രേഖസഹിതം അറിയിച്ചു.

സ്പെഷ്യൽ പബ്ലിക് പ്രോസിക്യൂട്ടർ വി.എസ്. വിനീത്‌കുമാർ, അഡ്വക്കേറ്റുമാരായ അൽഫാസ് മഠത്തിൽ, നവനീത്കുമാർ എന്നിവരാണ് പ്രോസിക്യൂഷന് വേണ്ടി ഹാജരായത്. പ്രതിഭാഗത്തിന് വേണ്ടി ഹാജരായത് ശാസ്തമംഗലം അജിത്ത്കുമാറും.

വശീകരിച്ചു വരുത്തി വിഷം

നൽകി: പ്രോസിക്യൂഷൻ

• 2022 ഒക്ടോബർ 14ന് ഒന്നാം പ്രതി ഗ്രീഷ്മ കാമുകൻ ഷാരോൺ രാജിനെ ലൈംഗികച്ചുവയുള്ള മൊബൈൽ ചാറ്റിലൂടെയും ഫോൺ കാളുകളിലൂടെയും വശീകരിച്ച് വീട്ടിലെത്തിച്ചു
• തുടർന്ന് കഷായത്തിൽ പാരക്വറ്റ് കളനാശിനി കലർത്തിയശേഷം കഷായ ചലഞ്ച് നടത്തി കുടിപ്പിച്ചാണ് കൊലപ്പെടുത്തിയത്
• സാവധാനം മനുഷ്യ ശരീരത്തിൽ പ്രവർത്തിക്കുന്ന വിഷമാണെന്ന് ഇന്റർനെറ്റിൽ തിരഞ്ഞ് പഠിച്ച ശേഷമാണ് ഗ്രീഷ്മ ഷാരോണിന് നൽകിയത്
• 11 ദിവസം മെഡിക്കൽ കോളേജ് ഐ.സി.യുവിൽ മരണത്തോടു മല്ലടിച്ച ശേഷമാണ് ഷാരോൺ രാജ് മരണപ്പെട്ടത്
• ഗ്രീഷ്മ ചതിച്ചതായി ഷാരോൺ സുഹൃത്ത് റെജിനോട് പറഞ്ഞതും കഷായത്തിൽ ഗ്രീഷ്മ എന്തോ കല‌ർത്തിയെന്ന മരണമൊഴിയും കേസിൽ നിർണായകമായി

കഷായത്തിൽ വിഷം ചേർത്തത്

ആത്മഹത്യയ്ക്ക്: പ്രതിഭാഗം

• പ്രതികൾ നിരപരാധികളാണ്. പാരസെറ്റമോൾ ഉപയോഗത്തെയും അമിതമായാലുള്ള ദൂഷ്യവശങ്ങളെയും കുറിച്ച് ഗ്രീഷ്മ ഇന്റർനെറ്റിൽ പരതിയത് പനി വന്നതു കൊണ്ടാണ്

• ഗ്രീഷ്മയ്ക്ക് ആത്മഹത്യാ പ്രവ‌ണതയുണ്ട്. ആത്മഹത്യ ചെയ്യാനായി കഷായത്തിൽ വിഷം ചേർത്ത് വയ്ക്കുകയായിരുന്നു
• ഗ്രീഷ്മ മുഖം കഴുകാനായി ബാത്റൂമിൽ കയറിയ സമയം ഷാരോൺ കഷായം കുടിക്കുകയും സ്വന്തം വീട്ടിലേക്ക് പോവുകയുമായിരുന്നു