പ്രസവത്തെത്തുടർന്ന് യുവതി മരിച്ചു, പരാതിയുമായി വീട്ടുകാർ

കരുനാഗപ്പള്ളി: കരുനാഗപ്പള്ളി​ താലൂക്ക് ആശുപത്രി​യി​ൽ പ്രസവത്തെത്തുടർന്ന് രക്തസമ്മർദ്ദം കുറഞ്ഞ 22 കാരി​ ആലപ്പുഴ മെഡി​. ആശുപത്രി​യി​ൽ ചി​കി​ത്സയി​ലി​രി​ക്കെ മരി​ച്ച സംഭവത്തി​ൽ പരാതി​യുമായി​ ബന്ധുക്കൾ. താലൂക്ക് ആശുപത്രി​യി​ലെ ചി​കി​ത്സാപ്പി​ഴവാണ് മരണകാരണമെന്നും ഡോക്ടർക്കെതി​രെ നടപടി​ സ്വീകരി​ക്കണമെന്നും ബന്ധുക്കൾ ആവശ്യപ്പെട്ടു.

തേവലക്കര വല്യത്ത് ജംഗ്ഷന് സമീപം കോട്ടപ്പുറത്ത് കിഴക്കതിൽ നൗഫലിന്റെ ഭാര്യ ജാരിയത്താണ് മരി​ച്ചത്. യുവതി​യുടെ രണ്ടാം പ്രസവമായി​രുന്നു. കഴി​ഞ്ഞ 14 നാണ് കരുനാഗപ്പള്ളി താലൂക്ക് ആശുപത്രിയിൽ അഡ്മിറ്റ് ചെയ്തത്. കലശലായ പ്രസവ വേദനയെ തുടർന്ന് വെള്ളിയാഴ്ച രാത്രി 12 മണിയോടെ നടന്ന ഓപ്പറേഷനി​ൽ യുവതി ഒരു പെൺകുട്ടിക്ക് ജന്മം നൽകി. തുടർന്ന് ജാരിയത്തിനെ നിരീക്ഷണ വാർഡിലേക്ക് മാറ്റി. എന്നാൽ പെട്ടന്ന് രക്തസമ്മർദ്ദം ക്രമാതീതമായി കുറഞ്ഞു. ഡോക്ടർമാർ കിണഞ്ഞ് പരിശ്രമിച്ചെങ്കിലും ഫലമുണ്ടായി​ല്ല. 108 ആബുലൻസിൽ ആലപ്പുഴ മെഡി​. ആശുപത്രിയിലേക്ക് മാറ്റി​. ശനിയാഴ്ച പുലർച്ചെ 4 മണിയോടെ വെന്റി​ലേറ്ററി​ൽ പ്രവേശി​പ്പി​ച്ചെങ്കി​ലും ഇന്നലെ രാവിലെ മരിച്ചു. കുഞ്ഞ് മെഡി. ആശുപത്രി ഐ.സി.യുവിലാണ്. ആദ്യ പ്രസവം തിരുവനന്തപുരം എസ്.എ.ടി ആശുപത്രിയിലായിരുന്നു. സംഭവത്തെ കുറിച്ച് അന്വേഷിക്കണമെന്ന് ആവശ്യപ്പെട്ട് മുഖ്യമന്ത്രി, ആരോഗ്യ വകുപ്പ് മന്ത്രി സിറ്റി പൊലീസ് കമ്മിഷണർ എന്നിവർക്ക് ഇന്ന് പരാതി നൽകുമെന്ന് ബന്ധുക്കൾ അറിയിച്ചു.