ലഹരിയിൽ നിന്ന് വിമുക്തി; ചികിത്സ തേടിയത് 11,113 പേർ

തൃശൂർ: ലഹരി ആസക്തിയിൽ നിന്ന് മോചനം തേടി കഴിഞ്ഞ ആറുമാസത്തിനിടെ എക്‌സൈസിനു കീഴിലുള്ള വിമുക്തി സെന്ററിൽ മാത്രം ചികിത്സ തേടിയെത്തിയത് 11,113 പേർ. ഏറ്റവും കൂടുതൽപേർ കോട്ടയത്തു നിന്ന്. 1642പേർ. ഒക്ടോബർ മുതൽ മാർച്ച് വരെയുള്ള കണക്കാണിത്. മദ്യം, മയക്കുമരുന്ന്, കഞ്ചാവ് ഉൾപ്പെടെ എല്ലാത്തരം ലഹരിക്കും അടിമകളായവരാണ് ചികിത്സ തേടിയെത്തിയത്.

കഞ്ചാവ്, രാസലഹരി എന്നിവയിൽ നിന്ന് മോചനം തേടി എത്തിയവർ മാത്രം 1427 പേരുണ്ട്. ഇതിലും കൂടുതൽ പേർ കോട്ടയത്തു നിന്നാണ്- 621. വിമുക്തിയിൽ മികച്ച ചികിത്സ ലഭിക്കുന്നതുകൊണ്ടാണ് ഇത്രയധികം പേർ ഇവിടെ എത്തുന്നതെന്ന് അധികൃതർ പറയുന്നു. അതേസമയം, പല വിമുക്തി സെന്ററിലും ആവശ്യമായ അടിസ്ഥാന സൗകര്യങ്ങളില്ലാത്തത് പ്രതിസന്ധി സൃഷ്ടിക്കുന്നുണ്ട്. പല ജില്ലകളിലും വിമുക്തി കോ ഓർഡിനേറ്റർമാരുടെ കാലാവധി കഴിഞ്ഞെങ്കിലും പുനർനിയമനമായിട്ടില്ല.

ചികിത്സയ്ക്ക് എത്തിയവർ

കോട്ടയം.......................1642

കോഴിക്കോട്................1285

തൃശൂർ..........................1236

കണ്ണൂർ..........................1223

തിരുവനന്തപുരം.........701

കൊല്ലം..........................418

പത്തനംതിട്ട.................369

ആലപ്പുഴ.......................486

ഇടുക്കി..........................610

എറണാകുളം...............773

പാലക്കാട്......................351

മലപ്പുറം.........................925

വയനാട്........................633

കാസർകോട്...............397