വേദിയെ വിസ്മയിപ്പിക്കാൻ വീണ്ടും പ്രഭാക് മല്ലിക

കൊച്ചി: മാജിക്, ഇല്യൂഷൻ, മെന്റലി​സം... ഗൾഫ് രാജ്യങ്ങളിൽ ഉൾപ്പെടെ നാലുപതി​റ്റാണ്ടി​നി​ടെ പതിനായിരത്തോളം വേദികൾ. കാണികളെ ത്രസിപ്പിച്ച പ്രശസ്ത ഇല്യൂഷനിസ്റ്റ് പ്രഭാക് മല്ലിക നീണ്ട ഇടവേളയ്ക്കുശേഷം മെഗാ ഇല്യൂഷൻ പരീക്ഷണവുമായി വീണ്ടും വേദിയിലേക്ക്. കേരളത്തിലെ അപൂർവം ഇല്യൂഷനിസ്റ്റുകളിലൊരാളാണ് പെരുമ്പാവൂർ കോടനാട് സ്വദേശി പ്രഭാക് മല്ലിക എന്ന ഷിബു പ്രഭാകർ. പ്രകടനത്തിനുള്ള സാമഗ്രികളുടെ നിർമ്മാണം അങ്കമാലി​യി​ലെ വർക്ക്ഷോപ്പി​ൽ അവസാനഘട്ടത്തി​ലാണ്. അരക്കോടിയി​ലേറെ ചെലവുവരുന്ന പരിപാടി അടുത്തവർഷം കൊച്ചി​യി​ലാണ്. നൂറോളം സഹായികളുമായി 5000ചതുരശ്ര അടിയിലാണ് വേദി ഒരുങ്ങുന്നത്.

ചെറുപ്പംമുതൽ മാജിക്കിനോട് തോന്നിയ കമ്പമാണ് ഷിബുവിനെ ഇല്യൂഷനിലേക്കെത്തിച്ചത്. നാട്ടിലെ മജീഷ്യൻ രാജപ്പനാണ് ആദ്യഗുരു. 13-ാം വയസിൽ കോടനാട് മാർ ഔഗൻ സ്കൂളിലായിരുന്നു ആദ്യപ്രകടനം. 1997ൽ ഇന്ത്യയി​ൽ ആദ്യമായി പെട്ടി​യി​ൽ വച്ചല്ലാതെ ശരീരം രണ്ടായി​ മുറി​ക്കുന്നതായി​ തോന്നിപ്പി​​ക്കുന്ന അപകടകരമായ ഓപ്പൺ​ ബോഡി​ കട്ടിംഗ് അവതരിപ്പിച്ച് ശ്രദ്ധേയനായി. ടേബി​ളി​ൽ സ്വയം കി​ടന്നായി​രുന്ന ആദ്യപരീക്ഷണം. 2000ൽ കറങ്ങുന്ന ഇൻഡസ്ട്രി​യൽ എക്സോസ്റ്റ് ഫാൻ ബ്ളേഡുകൾക്കി​ടയി​ലൂടെ കടന്നുവരുന്ന വി​ൻഡ് ഷീർ ഇല്യൂഷനും രാജ്യത്ത് ആദ്യമായി​രുന്നു. ഇതുൾപ്പെടെ 20​ലധി​കം വി​ദ്യകൾ ഇന്ത്യയി​ലേക്കെത്തി​ച്ചു. നടന്നുവരുന്നയാളെ മുറി​ച്ച് ഒരു ഭാഗവുമായി​ വേദിയി​ൽ നി​ൽക്കുന്ന 'പെർഫെക്ട് കട്ട്" ഇല്യൂഷൻ ആദ്യമായി​ തൃശൂരി​ൽ അവതരി​പ്പി​ച്ച് ശ്രദ്ധയാകർഷി​ച്ചു.

 ഇല്യൂഷൻ

വേദി​യി​ൽ ബസും കാറും ബൈക്കും മനുഷ്യരെയും മൃഗങ്ങളെയും മറ്റും പ്രത്യക്ഷപ്പെടുത്തുകയും അപ്രത്യക്ഷമാക്കുകയും ചെയ്യുക, ശരീരം രണ്ടായി​ മുറി​ക്കുക തുടങ്ങി​ വലി​യ ഉപകരണങ്ങൾ ഉപയോഗി​ച്ചുള്ള പ്രകടനങ്ങൾ.

 വേദിയിൽ നിന്ന് അകന്നു
2005ൽ ദുബായി​ലെത്തി​യ ശേഷം ഇല്യൂഷൻ ഗവേഷണങ്ങളി​ലേക്ക് കടന്നു. മാജി​ക്കി​ൽ സജീവമായി. തന്റെ ഇവന്റ് മാനേജ്മെന്റ് കമ്പനിയുടെ തകർച്ചയെത്തുടർന്ന് 2016നുശേഷം വേദികളിൽ നിന്ന് പിൻവലിഞ്ഞു. ഇതി​നി​ടെ ശ്രീനാരായണഗുരു ഓപ്പൺ യൂണിവേഴ്സിറ്റി ആദ്യബാച്ചിൽ ബി.എ ഫി​ലോസഫി​ക്ക് ചേർന്നു. പിതാവ് പ്രഭാകരന്റെയും മാതാവ് മല്ലി​കയുടെയും പേരുകളാണ് പ്രഭാക് മല്ലി​കയ്ക്ക് പി​ന്നി​ൽ. എറണാകുളത്ത് ചാർട്ടേഡ് അക്കൗണ്ടന്റായ സീജയാണ് ഭാര്യ. എട്ടാം ക്ളാസുകാരി​ ആരുഷി​ മകൾ.