തിരു.ജനറൽ ആശുപത്രിയിൽ കോർണിയ മാറ്റിവയ്ക്കൽ യൂണിറ്റ്

ഇന്ന് ലോക കാഴ്ചദിനം.

തിരുവനന്തപുരം : കണ്ണാശുപത്രിയ്ക്ക് പുറമേ ആരോഗ്യ വകുപ്പിന് കീഴിൽ ആദ്യമായി കോർണിയ ട്രാൻസ്‌പ്ലാന്റേഷൻ യൂണിറ്റ് യാഥാർഥ്യമാകുന്നു. തിരുവനന്തപുരം ജനറൽ ആശുപത്രിയിലാണ് അത്യാധുനിക സൗകര്യങ്ങളോടെയുള്ള യൂണിറ്റ് ഒരുങ്ങുന്നതെന്ന് ലോക കാഴ്ച ദിന സന്ദേശത്തിൽ മന്ത്രി വീണാ ജോർജ് അറിയിച്ചു

. ഒരു ദാതാവിന്റെ കണ്ണിൽ നിന്ന് ലഭിക്കുന്ന ആരോഗ്യമുള്ള നേത്രപടലം കാഴ്ച തകരാറുള്ള മറ്റൊരാളിലേക്ക് മാറ്റിവയ്ക്കുന്ന ശസ്ത്രക്രിയയാണിത്.. ഗുരുതരമായ രോഗങ്ങൾ കൊണ്ടോ അപകടങ്ങളാലോ കോർണിയ തകരാറിലായവർക്ക് കാഴ്ച വീണ്ടെടുക്കാൻ സഹായകരമാണ് കോർണിയ മാറ്റിവയ്ക്കൽ ശസ്ത്രക്രിയ.

. 'കുട്ടികളേ, നിങ്ങളുടെ കണ്ണുകളെ സ്‌നേഹിക്കൂ' എന്നതാണ് ഈവർഷത്തെ ലോക കാഴ്ച ദിന സന്ദേശം.

. കാഴ്ച പ്രശ്നമുള്ള സ്‌കൂൾ കുട്ടികൾക്കും വയോജനങ്ങൾക്കും സൗജന്യമായി കണ്ണട വാങ്ങി നൽകുന്നു. ജില്ലാ, ജനറൽ ആശുപത്രികളിലും, താലൂക്ക് ആശുപത്രികളിലും സൗജന്യ തിമിര ശസ്ത്രക്രിയ, എല്ലാ ജില്ലകളിലും സഞ്ചരിക്കുന്ന നേത്ര ക്യാമ്പുകൾ, ഡയബറ്റിക് റെറ്റിനോപ്പതി തടയാൻ നോൺ മിഡ്രിയാറ്റിക് ക്യാമറകൾ ഉപയോഗിച്ചുള്ള ചികിത്സ, സൗജന്യ ഗ്ലോക്കോമ ചികിത്സ ഉൾപ്പെടെ ലഭ്യമാണ്.