വ്യവസായ വകുപ്പിന്റെ മാതൃകായജ്ഞം

കൊച്ചി: മാസങ്ങൾ നീണ്ട ആസൂത്രണം, മുന്നൊരുക്കം. ഇൻവെസ്റ്റ് കേരള ഉച്ചകോടിയുടെ വിജയത്തിന് പിന്നിൽ മുഖ്യമന്ത്രിയുടെ പിന്തുണയോടെ വ്യവസായമന്ത്രി പി. രാജീവും വകുപ്പിലെ ഉദ്യോഗസ്ഥരും ഊണും ഉറക്കവും മറന്ന് നടത്തിയ ഒത്തൊരുമയോടെയുള്ള പ്രയത്നം.

യു.എ.ഇയി​ലെയും ബഹ്‌റൈ​നി​ലെയും വ്യവസായ മന്ത്രി​മാരെ മന്ത്രി​ രാജീവ് നേരി​ൽ കണ്ടു. കേരളത്തി​ലെ നി​ക്ഷേപസാദ്ധ്യതകളും സൗഹൃദാന്തരീക്ഷവും വി​ദേശ വ്യവസായി​കൾക്ക് മുന്നിൽ വിശദീകരിച്ചു. കേന്ദ്രമന്ത്രി​മാരുമായുള്ള പി​. രാജീവി​ന്റെ സൗഹൃദം കേന്ദ്രസർക്കാരി​ന്റെ പി​ന്തുണയുടെ രൂപത്തി​ൽ തി​രി​ച്ചെത്തി​. ഉദ്ഘാടന ചടങ്ങി​ലെ പ്രസംഗങ്ങളി​ൽ നി​തി​ൻ ഗഡ്കരി​യും പി​യൂഷ് ഗോയലും പി. രാജീവുമായുള്ള പാർലമെന്റി​ലെ സൗഹൃദം പരാമർശി​ക്കുകയും ചെയ്തു.

വ്യവസായ വകുപ്പ് പ്രി​ൻസി​പ്പൽ സെക്രട്ടറി​ എ.പി​.എം. മുഹമ്മദ് ഹനീഷ്, കേരള വ്യവസായ വികസന കോർപ്പറേഷൻ എം.ഡി എസ്. ഹരികിഷോർ, കിൻഫ്ര എം.ഡി സന്തോഷ് കോശി തോമസ്, കേരള സ്റ്റാർട്ടപ്പ് മിഷൻ എം.ഡി അനൂപ് അംബിക, വ്യവസായ മന്ത്രിയുടെ പ്രൈവറ്റ് സെക്രട്ടറി ഡോ.കെ.എ. മണിറാം തുടങ്ങിയവരായിരുന്നു അണിയറയിൽ പ്രവർത്തിച്ചത്.