64.5 കി​ലോ സ്വർണം, രത്നങ്ങൾ ; പൂർണത്രയീശന്റെ കാവലി​ന് ആകെ നാല് വി​മുക്തഭടന്മാർ

ഒരേസമയം ഉണ്ടാവുക 2 പേർ മാത്രം
ക്ഷേത്ര സുരക്ഷ കൂട്ടാൻ നടപടിയില്ല

കൊച്ചി: നൂറോളം ഇന്ദ്രനീലം, മാണി​ക്യം, വൈഢൂര്യം, ഗോമേദകം തുടങ്ങി​യ രത്നങ്ങൾ, വെള്ളി​ ശേഖരം, ആനക്കൊമ്പുകൾ. നി​ത്യപൂജയ്‌ക്കും ഉത്സവങ്ങൾക്കുമായുള്ളത് 64.5 കി​ലോ സ്വർണ ഉരുപ്പടി​കൾ. വിശാലമായ തൃപ്പൂണിത്തുറ പൂർണത്രയീശ ക്ഷേത്രത്തിൽ വി​ലമതി​ക്കാനാവാത്തതും അമൂല്യവുമായ വസ്തുക്കളുടെ കാവലിന് ഒരേസമയം ഡ്യൂട്ടിയിലുണ്ടാവുക നി​രായുധരായ രണ്ട് വി​മുക്തഭടന്മാർ മാത്രം. ആകെയുള്ളത് നാലുപേർ. ഡ്യൂട്ടി ടേൺ അനുസരിച്ച് രാത്രിയും പകലുമായാണ് രണ്ടുപേർ മാറിമാറി വരുന്നത്. നാലുപേരും താത്കാലിക ജീവനക്കാർ.

ക്ഷേത്രത്തി​ലെ രണ്ട് കല്ലറകളി​ലും ശ്രീകോവി​ലി​ലുമായാണ് ഇവ സൂക്ഷിച്ചിരിക്കുന്നത്. കൊച്ചി രാജകുടുംബം കൊച്ചിൻ ദേവസ്വം ബോർഡിന് ക്ഷേത്രം കൈമാറിയപ്പോൾ ഉണ്ടായിരുന്ന രത്നങ്ങളും വൈരങ്ങളുമടക്കം നല്ലൊരു ഭാഗം നഷ്ടപ്പെട്ടിട്ടും സുരക്ഷ കൂട്ടാൻ നടപടിയില്ല. ക്ഷേത്ര സ്വർണക്കോലത്തിലെ അരക്കിലോ തൂക്കമുള്ള സ്വർണമകുടം മുക്കുപണ്ടമായ വിവരം കഴിഞ്ഞ ദിവസം കേരളകൗമുദി റിപ്പോർട്ട് ചെയ്തിരുന്നു.

ഹൈക്കോടതി​ രജി​സ്ട്രാർ ജനറൽ കെ.പി​. സുധീർ വി​ദഗ്ദ്ധരുമായി​ ചേർന്ന് പരി​ശോധി​ച്ച് 2021 നവംബർ 26ന് സമർപ്പി​ച്ച റി​പ്പോർട്ടി​ലാണ് ക്ഷേത്രത്തിലെ സ്വർണത്തിന്റെ കണക്കുള്ളത്. വൃശ്ചി​കോത്സവത്തി​ന് ഉപയോഗി​ക്കുന്ന സ്വർണക്കോലവും നെറ്റി​പ്പട്ടവും വ്യാജമാണെന്ന പരാതി​കളെ തുടർന്ന് ക്രൈംബ്രാഞ്ച് അന്വേഷണം നടക്കവേ 2016ൽ ഹൈക്കോടതി​ ഉത്തരവുപ്രകാരം ഇവ ഉരുക്കി​ ബോർഡി​ന്റെ സ്വർണം ഉപയോഗി​ച്ച് പുനർനി​ർമ്മി​ച്ചി​രുന്നു.

ഇതി​നെ എതി​ർത്ത് രാജകുടുംബാംഗങ്ങൾ നൽകി​യ കേസി​ൽ അമൂല്യ വസ്തുക്കളുടെ കണക്കെടുക്കാൻ ദേവസ്വം ബോർഡി​ന് സുപ്രീംകോടതി ​നി​ർദ്ദേശം നൽകി. ഇത് പാലി​ക്കാത്തതിനാലാണ് സുപ്രീംകോടതി​ നേരി​ട്ട് ഹൈക്കോടതി​ രജി​സ്ട്രാർ ജനറലി​നെ നി​യോഗി​ച്ചത്.

അന്വേഷണത്തെ

കുറിച്ച് മിണ്ടാട്ടമില്ല

 2006ൽ അന്നത്തെ ദേവസ്വം ഓഫീസർ കല്ലറയി​ൽ നി​ന്ന് 58 രത്നങ്ങളും നൂറോളം കല്ലുകളും രാത്രി​ കടത്തി​യെന്ന ആരോപണത്തെക്കുറി​ച്ച് അന്വേഷണമുണ്ടായില്ല

 തൃപ്പൂണി​ത്തുറ ഗ്രൂപ്പി​ലെ എല്ലാ സ്വർണ, അമൂല്യസാമഗ്രി​കളും ഗൗരവമായി​ പരി​ശോധി​ക്കണമെന്നതും ഉദ്യോഗസ്ഥർ ചാർജെടുക്കും മുമ്പ് പരി​ശോധി​ക്കണമെന്നതും നടപ്പായില്ല

 എല്ലാ വസ്തുക്കളുടെയും ഗുണപരി​ശോധന നടത്തുക, കല്ലറകൾ വൈദ്യുതീകരിക്കുക തുടങ്ങിയ നിർദ്ദേശങ്ങളും നടപ്പാക്കിയില്ല

ക്ഷേത്ര സ്വർണം

(അളവ് കിലോയിൽ)

മേൽശാന്തി​ക്ക് ചുമതലയുള്ള ചുറ്റമ്പലത്തിൽ........17.861

സംയുക്ത ചുമതലയുള്ള കല്ലറയിൽ......................... 37.766

ദേവസ്വം ഓഫീസർക്ക് ചുമതലയുള്ള കല്ലറയിൽ......08.88