ന്യൂനമർദ്ദം: മഴ കനക്കും

തിരുവനന്തപുരം:സംസ്ഥാനത്ത് വേനൽ മഴ ശക്തമാകുന്നു.വ്യാഴാഴ്ചവരെ ഇടിമിന്നലോടു കൂടിയ മഴയ്ക്കും മണിക്കൂറിൽ 40-50 കിലോമീറ്റർ വരെ വേഗതയിൽ ശക്തമായ കാറ്റിനും സാദ്ധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു.മന്നാർ ഉൾക്കടലിനും ശ്രീലങ്കയ്ക്കും മുകളിലായുള്ള ചക്രവാതച്ചുഴി,ബംഗാൾ ഉൾക്കടലിലെ ന്യൂനമർദ്ദ സാദ്ധ്യത,ന്യൂനമർദ്ദപാത്തി എന്നിവയാണ് മഴ സാദ്ധ്യത വർദ്ധിപ്പിക്കുന്നത്.ഇന്ന് കൊല്ലം,പത്തനംതിട്ട,ആലപ്പുഴ ജില്ലകളിലും നാളെ പത്തനംതിട്ട,ആലപ്പുഴ,കോട്ടയം,എറണാകുളം ജില്ലകളിലും യെല്ലോ അലർട്ടാണ്.