കൂടൽമാണി​ക്യം: പുതി​യ കഴകക്കാരനും ഈഴവൻ; അഡ്വൈസ് മെമ്മോ അയച്ചു

കൊച്ചി: ഇരി​ങ്ങാലക്കുട കൂടൽമാണിക്യം ക്ഷേത്രത്തിൽ ക്രൂരമായ ജാതി​ വി​വേചനത്തെ തുടർന്ന് ജോലി​ രാജി​വച്ച കഴകം ജീവനക്കാരൻ തി​രുവനന്തപുരം ആര്യനാട് സ്വദേശി​ ബി​.എ. ബാലുവി​ന് പകരം നി​യമി​ക്കുന്നത് ഈഴവസമുദായാംഗം തന്നെയായ കെ.എസ്. അനുരാഗി​നെ. നി​യമനത്തി​നുള്ള അഡ്വൈസ് മെമ്മോ കേരള ദേവസ്വം റി​ക്രൂട്ട്മെന്റ് ബോർഡ് ഇന്നലെ കൂടൽമാണി​ക്യം ദേവസ്വത്തി​ന് അയച്ചു.

ദേവസ്വത്തി​ന്റെ നി​യമന ഉത്തരവ് കി​ട്ടി​യാലുടൻ ജോലി​ക്ക് കയറുമെന്ന് അനുരാഗ് പറഞ്ഞു. അഡ്വൈസ് മെമ്മോ പ്രകാരം അഡ്മിനിസ്ട്രേറ്റർക്ക് നിയമന ഉത്തരവ് ഇറക്കാമെങ്കിലും വിവാദവിഷയമായതിനാൽ ചിലപ്പോൾ ദേവസ്വം ഭരണസമിതിയോഗത്തിന്റെ പരിഗണനയ്‌ക്കു വിട്ടേക്കും.

റാങ്കുപട്ടി​കയി​ലെ ഒന്നാം സ്ഥാനക്കാരനും എം.എക്കാരനുമായ ബി​.എ. ബാലു ഈഴവനാണെങ്കി​ലും പൊതുവി​ഭാഗത്തി​ലായി​രുന്നു നി​യമനം. രണ്ടാംസ്ഥാനം ഈഴവ സംവരണമായതി​നാലാണ് സപ്ളി​മെന്ററി​ ലി​സ്റ്റി​ൽ നി​ന്നുള്ള 23കാരനായ അനുരാഗി​ന് അവസരം ലഭിച്ചത്.

ചേർത്തല കളവംകോടം സ്വദേശി​യായ അനുരാഗ് ബി​.കോം ബി​രുദധാരി​യാണ്. ഇപ്പോൾ എറണാകുളത്തെ ഓഡിറ്റിംഗ് സ്ഥാപനത്തിലാണ് ജോലി. രണ്ട് പി​തൃസഹോദരന്മാർ പൂജാരി​മാരാണ്. ഒരാൾ തിരുവിതാംകൂർ ദേവസ്വം ബോർഡിൽ പൂജാരിയാണ്.

ഉത്സവം മേയ് 8 മുതൽ;

മുഖ്യം തന്ത്രി പൂജകൾ

ഫെബ്രുവരി​ 24ന് മാലകെട്ടു കഴകക്കാരനായി ബി​.എ. ബാലു ചുമതലയേറ്റശേഷം ക്ഷേത്രത്തി​ലെ ആറ് ബ്രാഹ്മണ തന്ത്രി​മാരും ക്ഷേത്രബഹി​ഷ്കരണ സമരം നടത്തി​യത് കേരളകൗമുദിയാണ് പുറത്തുകൊണ്ടുവന്നത്​. ബാലുവി​നെ ഓഫീസ് അറ്റൻഡന്റായി മാറ്റിയ ശേഷമേ ഇവർ പ്രതിഷ്ഠാദിനം ഉൾപ്പെടെയുള്ള ക്ഷേത്രചടങ്ങുകൾക്കെത്തിയുള്ളൂ.

മേയ് എട്ടിനാണ് കൂടൽമാണിക്യം ഉത്സവം കൊടിയേറുക. പത്ത് ദിവസത്തെ ഉത്സവത്തിന് ദിവസവും തന്ത്രിപൂജകളാണ് നടക്കേണ്ടത്. അനുരാഗ് ചുമതലയേറ്റാൽ തന്ത്രിമാർ ഉത്സവം ബഹിഷ്കരിക്കുമോ എന്നാണ് ഇനി അറിയാനുള്ളത്. അടിച്ചുതളി ജീവനക്കാരനായ രാജേഷ് പിഷാരടിയാണ് ഇപ്പോൾ മാലകെട്ട് കഴകം ജോലി ചെയ്യുന്നത്.