മരച്ചില്ല വീണാൽ വാഹനാപകടമല്ല

ന്യൂഡൽഹി: നിറുത്തിയിട്ടിരിക്കുന്ന വാഹനത്തിന് മുകളിൽ മരച്ചില്ല വീണതിനെ വാഹനാപകടമായി കണക്കാക്കാനാകില്ലെന്ന് സുപ്രീംകോടതി. കനത്ത മഴയത്ത്
ബംഗളൂരുവിൽറോഡുവക്കിൽ നിറുത്തിയിട്ടിരുന്നഓട്ടോറിക്ഷയ്‌ക്കു മേൽ മരച്ചില്ല വീണതിനെ തുടർന്ന് യാത്രക്കാരന് ഗുരുതര പരിക്കേറ്റിരുന്നു.

ഈ കേസ് പരിഗണിക്കവേയാണ് ജസ്റ്റിസുമാരായ സഞ്ജയ് കരോൽ,​ എൻ. കോട്ടീശ്വ‌ർ സിംഗ് എന്നിവരടങ്ങിയ ബെഞ്ചിന്റെ നിലപാട്. ഈ കേസിൽ ഉൾപ്പെട്ട വാഹനത്തിന് അപകടത്തിൽ ഒരു പങ്കുമില്ല. വഴിപോക്കനെന്ന നിലയിൽ ആ മരത്തിനു കീഴിൽ നിന്നിരുന്നുവെങ്കിലും അപകടം സംഭവിക്കുമായിരുന്നു.

മോട്ടോർ വാഹന നിയമം ഇവിടെ പ്രയോഗിക്കാൻ കഴിയില്ലെങ്കിലും,​ ഗുരുതര പരിക്കേറ്റ യാത്രക്കാരന്റെ കാര്യത്തിൽ മനുഷ്യത്വപരമായ സമീപനം സ്വീകരിക്കുകയാണെന്ന് കോടതി പറഞ്ഞു. കർണാടക ഹൈക്കോടതി അനുവദിച്ച 17.10 ലക്ഷം രൂപ നഷ്‌ടപരിഹാരം 25 ലക്ഷമാക്കി ഉയർത്തി. ബ‌ൃഹത് ബംഗളൂരു മഹാനഗര പാലികയും,​ സംസ്ഥാന ഹോർട്ടികൾച്ചർ വകുപ്പും,​ ഇൻഷ്വറൻസ് കമ്പനിയും ചേർന്ന് നാല് ആഴ്ചയ്‌ക്കകം തുക യാത്രക്കാരന് കൈമാറണം.

2007 ജൂണിലാണ് കെ.കെ.ഉമേഷ് കുമാർ എന്നയാൾക്ക് പരിക്കേറ്റത്. നഷ്‌ടപരിഹാരം വിധിച്ച കർണാടക ഹൈക്കോടതി നടപടി ചോദ്യംചെയ്‌ത് ബ‌ൃഹത് ബംഗളൂരു മഹാനഗര പാലിക അടക്കം സമ‌ർപ്പിച്ച ഹർജികളാണ് സുപ്രീംകോടതി പരിഗണിച്ചത്.