മാർച്ച് മാസത്തെ ക്ഷേമപെൻഷൻ അനുവദിച്ചു

തിരുവനന്തപുരം: മാർച്ച് മാസത്തെ ക്ഷേമപെൻഷൻ അനുവദിച്ച് സർക്കാർ ഉത്തരവായി. കഴിഞ്ഞ വർഷം ഏപ്രിൽ മുതൽ അതത് മാസം കൃത്യമായി സാമൂഹ്യപെൻഷൻ അനുവദിക്കുമെന്നുള്ളത് ബഡ്ജറ്റ് വാഗ്ദാനമായിരുന്നു. 5മാസത്തെ സാമൂഹ്യപെൻഷൻ കുടിശികയിൽ രണ്ടെണ്ണം 2024-25 വർഷത്തിൽ വിതരണം ചെയ്യുമെന്ന ഉറപ്പ് സർക്കാർ പാലിച്ചിരുന്നു. ശേഷിക്കുന്ന 3കുടിശികകൾ 2025-26 വർഷത്തിൽ അനുവദിക്കും. ഇതിൽ ഒരെണ്ണം വിഷുവിനോട് അനുബന്ധിച്ച് വിതരണം ചെയ്തേക്കും. മാർച്ച് മാസത്തെ സാമൂഹ്യപെൻഷനായി 817കോടിയാണ് അനുവദിച്ചത്. 62ലക്ഷംപേർക്ക് 1600രൂപ വീതമാണ് നൽകുക. 26ലക്ഷം പേർക്ക് നേരിട്ട് ബാങ്കിലെത്തും.ബാക്കിയുള്ളവർക്ക് വീട്ടിലെത്തി നൽകും. വ്യാഴാഴ്ച മുതലാണ് പെൻഷൻ വിതരണം നടക്കുക.