ഭീഷണിയെങ്കിൽ മാത്രം  പാതയോര മരം വെട്ടാം

കൊച്ചി: ജനങ്ങളുടെ ജീവന് ഭീഷണിയാണെങ്കിൽ മാത്രമേ പാതയോരങ്ങളിലെ മരങ്ങൾ വെട്ടിമാറ്റാൻ അനുമതി നൽകാവൂ എന്ന് സർക്കാർ ഉത്തരവ്. വാണിജ്യ ആവശ്യങ്ങളുടെ പേരിൽ പാതയോരങ്ങളിലെ മരങ്ങൾ മുറിക്കരുത്. മേയിലെ ഹൈക്കോടതി ഉത്തരവിന്റെ തുടർച്ചയായാണ് ചീഫ് സെക്രട്ടറി വിവിധ വകുപ്പുകൾക്ക് നിർദ്ദേശം നൽകിയത്. ബന്ധപ്പെട്ട സമിതിയുടെ അംഗീകാരവും വേണം. സമീപത്തെ കെട്ടിടങ്ങൾക്ക് തടസമാകുന്നു തുടങ്ങിയ കാരണങ്ങളാൽ വെട്ടാൻ അനുമതി നൽകാനാവില്ല. മരങ്ങൾ വെട്ടാൻ അനുമതി നൽകുന്നതിൽ നിയന്ത്രണം ഏർപ്പെടുത്തി 2010ൽ സർക്കാർ ഉത്തരവിട്ടിരുന്നെങ്കിലും കർശനമായി പാലിച്ചിരുന്നില്ല.